حكايتي مع سرطان الثدي في سن صغير
بسم الله الرحمن الرحيم
(حكايتي مع سرطان الثدي في سن صغير)
انا اسراء لما اكتشفت المرض عمري كان ٢٧سنة بس هوة موجود وانا عندي ١٨سنة ازاي لاني كنت بحس كلكوعة صغيرة صلبة جدا ولما كنت بقول للي حواليا كانو يقولو هرمونات فامهتمتش لحد ما كبرت طبعا السن دة مع سرطان الثدي مش بيحصل كتير كنت عايشة حياتي طبيعي جدا انا متزوجة وعندي بنت وحيدة جوزي كان مسافر وكنت بخطط اجيب طفل تاني ويشاء القدر اكشف نسا واقول للدكتورة عندي كلكوعة طلبت فورا ماموجرافي روحت اعملة في الاول اترفض بسبب صغر السن ولما عملت السونار المكان اتقلب حرفيا كلة بيجري واتحولت فورا رنين مغناطيسي ودي كانت بداية الرحلة اربع ايام وظهر والنتيجة مش مبشرة فورا سحب عينة وللغريب طلعت في يومين اصابة كاملة للغدد تحت الابط وورمين بالثدي خبيث وورم حميد طبعا صدمة ازاي وانا مش حاسة باي اعراض بالاخص تحت الابط طبعا في تفاصيل كتيير في النص بس دة علي اد مااقدر مختصر جوزي كان لسة مسافر وقتها ووالدي كان لسة متوفي قريب ومفيش غير امي اللي كانت الدعم الاكبر وجوزي طبعا واخواتي ابتديت رحلة الكيماوي والعملية والاشعاعي والموجة والهرموني اخدت ٨جلسات كيماوي مكثف و٣٠جلسة اشعاعي و١٧جلسة موجة وحاليا مرحلة الهرموني الحمدلله عدت وكنت سبب في دعم الناس حواليا واكتشاف حالات بسبب اصراري ليهم للكشف المبكر والحمد لله رب العالمين بسبب تفائلي واصراري اني لازم ارجع كويسة اشتغلت دعم نفسي ومنسق اعلامي في حملة سيادة الرئيس للكشف المبكر عن سرطان الثدي والعلاقات العامة في مركز اورام المنيا بس للاسف اضطريت اسيبة بسبب كورونا ومازالت ادعم البنات والسيدات واكون دعم نفسي للي لسة مكتشف ودعواتكم بالشفاء العاجل لكل مصاب يارب طبعا الحكاية طويلة وتفاصيل كتييير اوي ممكن احكيها تاني بالتفصيل بإذن الله
