ست بمية راجل

أنا إسمي أحلام إبراهيم غنيم وعمري ستين سنه مؤهل متوسط وكنت بشتغل موظفه فوحده بيطريه بقريه صغيره في محافظة الغربيه ..أرمله من 15سنه زوجي توفي وترك ليا ست أولاد ثلاث بنات وثلاث أولاد كانت أكبرهم بنتي الأولي فسنه تانيه كليه طب بنتي الثانيه ثانويه عامه وأصغر طفله عندي مدخلتش المدرسه ..كان والدهم الله يرحمه موظف في وحده صحيه وكنا عايشين بمرتبي ومرتبه وكان بيشتغل عمل اضافي في محل بعد الظهر عشان نقدر نوفي طلبات اولادنا..توفي زوجي فجأه وهو بيصلي ع جنازه فالمسجد والناس جابهولي من المسجد ميت وكان ديما يقولي انا حاسس اني هموت بدري أرد عليه اقوله والست أولاد دول أعمل فيهم ايه أربيهم ازاي يرد عليا يقولي لو ربنا عالم انك مش قد الحمل مش هيحملهولك..مات ومكنش سايب غير شقه صغيره عايشين فيها فبيت العيله ومعاش 700 جنيه..فجأه لقيت نفسي أب وأم لست ولاد وطبعا لازم أوفر لاولادي عيشه كريمه طلعلي مكافأه نهايه خدمه زوجي عشر الاف جنيه رحت جبت بيهم ملابس وطبعا لان مفيش راس مال يفتح محل بقيت اخد البضاعه اللي بشتريها والف بيها علي الموظفين في المصالح الحكوميه جمب شغل الحكومه بتاعي واروح بيتي اخر النهار اشوف مطالب بيتي واولادي وفضلت علي الحال ده لحد ما علمت أولادي وجهزت اول بنتين وجوزتهم وجه دور الاولاد اللي بعدهم طبعا مفيش ليهم شقق فضلت اعمل جمعيات لحد ما جمعت مبلغ واشتريت ليهم قطه ارض عشان يبنو عليها بيت ليهم وبعد ما اتخرجو الولاد من التعليم واحد دخل الجيش واخوه التوأم خد اعفاء من الجيش لانه كان عامل حادثه بعد جواز اخته واترفض من الجيش وبعد ما تعافي من أثار الحادثه بدأ يدور علي شغل واشتغل ف مجال السياحه وبدأ يساعد معايا فالمصاريف لحد ما أخوه خلص جيش وطلع قال انا عايز أسافر أروبا وفعلا سافر فرنسا ولكن للاسف الظروف كانت وحشه جدا وعرفش يشتغل ورجع بعد سنتين يدوب كان مكفي مصاريفه رجع اشتغل شويه فالالكترونيات وبعدها جاب فيزا وسافر السعوديه بقيت أشتغل انا والولدين واعملهم جمعيات وبدأنا نبني فالبيت شويه بشويه لحد ما عملنا لمل واحد شقه وخطبتلهم وجوزتهم الولدين التوأم فيوم واحد وفضل معايا ولد وبنت فضلو الولاد يشتغلو وانا معاهم وجهزنا أختهم الصغيره وجوزناها وباقي الولد الصغير خلص تعليمه واشتغل وهيتجوز ان شاء الله كمان شهرين وطبعا انا مع ولادي وأحفادي شايله هم كل واحد فيهم وفي اولادهم لحد اليوم …والنهارده انا بكتب حكايتي فأول يوم ليا فالسعوديه رايحه أعمل عمره رمضان بعد ما ابني عملي زياره …وبتمني من ربنا اني ديما أشوف أولادي وأحفادي فأحسن صحه وأحسن حال