الإصرار على الهدف

انا دكتور جلدية عندى ٣١ سنة
و كنت بطلة رماية (مسدس) على مدار ١٠ سنوات
يعنى فى ثانوية عامة كنت بذاكر و بتمرن و بسافر بطولات و بجيب score و ميداليات..
طبعاً كل اللى حواليا و حوالين اهلى شايفين ان كدة غلط و اننا مش مركزين فى المزاكرة، و ليه بنت تمسك سلاح و حاجات كدة،، و كلام محبط كتير،،
بس اهلى كانوا ديماً فى ظهرى و مشجعينى انى اعرف اعمل الاتنين
كتير كنت بقع بس كانوا بيلحقونى
لما جيت ادخل الكلية( كلية طب بشرى جامعة عين شمس) ، كتير قالوا صعبة و مش هتنفع مع آيه و life style بتاعها
بس دخلتها و كله قعد يحبط فينا
و طلعت منها بتقدير عالى الحمد لله
و اتجوزت،، و انا حامل امتحنت 1st part master و كنت مسابقة دفعتى ب ٦ شهور فى تقديمى للماچستير من كتر ما كنت عايزة اثبت نفسى و اذاكر و اتفوق فى الجلدية و ابقى بس سبب فى فرحة السيدات او فى تجميل اى حاجة و ابسطهم،،
و عديت و نجحت من اول مرة و دى مابتحصلش فى طب
و امتحنت ال 2nd part بعت ما جبت بنوتى و هى لسة شهور
يعنى كنت بذاكر و تعبانة و والدة و مش بنام منها
الوقت دة اللى ساعدنى كتير اوى اهلى و جوزى و اهله  كلهم وقفوا جنبى كتير اوى..
و عديت برده من اول مرة الحمد لله و بقيت اخصائى جلدية فى سن صغير
و بقيت keen انى احضر اى حاجة فيها new updates فى مجالى
وعملت اسم كويس فى المكان اللى بشتغل فيه بقالى سنين
و معايا دلوقتى بنوتين
مهمة صعبة انى اوفق بين البنتين و جوزى و بيتى و بين شغلى و عيانينى اللى بيجولى بالاسم..
و بين صلة الرحم باهلى و اهله
بتعب ساعات و بحس ب load بس بقوم عشان اكمل و عشان خاطر اهلى يفرحوا بيا و بتعبهم فيا
و عشان اعلى اسم مصر زى ما اتعودت و انا ف الرماية
و فعلاً حصل و اتكرمت اول الشهر دة فى دبى
اتكرمت كواحدة من اكتر ٥٠ سيدة مؤثرة فى الوطن العربى فى مؤتمر تكريم المرأة العربية فى دبى..
و كانت اللجنة و كل اللى اتكرموا مستغربين من صغر سنى و وصولى لكدة الحمد لله
شكراً