Noah’s mother
السلام عليكم، أنا سهاد عندي ولد عنده ٤ سنين اسمه نوح، نوح عنده متلازمة داون وعرفت ده وهو عنده ٨ شهور طبعا أول ما عرفت اتصدمت وكان عندي انكار للموضوع بس قدرت أعدي الموضوع وأبدأ اشوف ايه احسن حاجة ممكن تتعمل لنوح و تطوره زى العلاج طبيعيى والتخاطب وتنمية المهارات
بعد فترة قررت أعمل لنوح أكاونت على انستجرام عشان محتاجة ان كل الناس تعرف اكتر مش عن نوح بس بس لكل لأصحاب متلازمة داون و تعرف ان هم مش أقل مننا في حاجة، و عشان يشوفوا طفل عادي عنده متلازمة داون عايش حياته اليومية ازاى
فعشان كدة عملت حملة توعية بتعريف ايه هى متلازمة داون فى شهر اكتوبر (شهر التوعية بمتلازمة داون) و شارك فيها اكتر من ثلاثين فنان و رياضى و كانت الحمدلله من انجح الحملات
عملت الاكاونت عشان كنت محتاجة أشوف أطفال أكبر من نوح عايشين حياتهم ازاي ومتلازمة داون مأثرة على حياتهم ازاي فكنت عايزة كل الناس مش بس اللي ولادهم عندهم متلازمة داون يشوفوا ان هم زي كل الأطفال وعايشين حياة طبيعية حتى لو محتاجين شوية شغل عشان يكونوا أحسن وحتى لو بيتأخروا في حاجات بس في الآخر هم زي كل الأطفال مش ناقصين أي حاجة بالعكس زايدين حنية وطاقة حب تكفي العالم كله♥️
هدفى الاساسى انى بعد ما شفت اللي أكبر من نوح والتنمر اللي بيتعرضوا له والرفض من المجتمع ومن المدارس انى أحاول لو أقدر بأي شكل من الأشكال أطالب بأبسط حقوقهم في الحياة والتعليم والشغل و ان اى ام محتاجة تتكلم مع حد بيمر بكل اللي هي بتمر بيه أو محتاجة تتكلم مع حد من غير ما يحكم على أي حاجة هي حاسة بيها تلاقي ده
