انسان جديد

مش عارفة ابدا منين بس حياتي قبل الجواز و الطلاق حاجة و بعده حاجة تانية اختبار حقيقي صعب و قاسي
فعلا بقيت وحدة جديدة اقوي من بعده
اتجوزت ٣ سنين و نص و عشت مع راجل نرجسي خلاني اسيب شغلي و أهلي و أصدقائي منغير محس
مكنش بيشتم ولا بيضرب بس كان شاطر اوي في الاحباط و تكسير المجديف و دائم التحقير من شاني و اناني درجة اولي و اتحولت من وحده حلوة واثقه في نفسها لست كبرت ٥٠ سنة و تخنت اكثر من ٣٠ كيلو من الاكتئاب
كرهت نفسي و كل حاجة لحد مصحيت في يوم و بدون مقدمات لقيت نفسي مطروده من بيتي و معايا طفلة سنتين
مختش حاجة من البيت ولا حتي هدومي
سرق كل حاجة فلوس و دهبي حتي لعب بنتي
حاولت اطلق رفض و بعد سنة عذاب رفعت خلع عشان اخلص
كانت أصعب مرحلة في عمري اني اكون مطلقة و معايا طفلة و انا يدوب ٢٧ سنة احساس بشع بالفشل و الاحباط
مش عارفة اشتغل في اي حتة عشان فضلت ٣ سنين بعيدة عن سوق العمل و لما الناس كانت بتعرف اني مطلقة نظرتهم ليا بتختلف و كأني عملت جريمة
سمعت كلام كتير جارح و افتراء ده غير الأصدقاء و الأقارب الي فجأة بانوا علي حقيقتهم
و في يوم من سنة قررت انسي كل ده و قلت مش هفضل في الدوامة دي بقيت حياتي و خت قرار التغير و النجاح مهما كان
خسيت من ٩٥ كيلو ل ٦٠ كيلو
أنهيت علاقتي بكل الناس المحبطة
بدأت مشروعي الخاص صفحة صغيرة علي الانستجرام استغليت موهبتي في الرسم و بدأت ارسم علي ملابس بطريقة مختلفة و جديدة
قررت أن الي هيشوفني وحشة من عاوزاه في حياتي طلامة انا وثقة من نفسي اني مش بعمل حاجة غلط
اهتميت ببنتي و قررت انها لازم تشوف امها ست جميلة و قوية عشان ابقي قدوة ليها
انهارده مشروعي بدأ يكبر و يديني امل اني ممكن أنجح و بقي افضل لوحدي مهما كان في ناس كل همها تكسرني طلما ربنا معايا
الخلاصة ان تجربة الطلاق حقيقي مريرة و بتكسر بس الناس بتصعبها علينا اكتر و اكتر و بيدوسوا علينا زي ميكون مش من حقنا نعيش بعدها خلاص بس لو قررنا نرمي الناس ورا ظهرنا و كأنهم مش موجودين و نقرر ننجح لازم هننجح عشان ربنا عارف قد ايه اتظلمنا و ان الاختبار حقيقي كان صعب