انتي تستاهلي
كلنا نستاهل نعيش حياتنا بشكل يليق بينا يليق بخلق الله في الارض يليق بالبني ادم اللي ربناه سبحانه وتعالي اكرمه وذكره في قرآنه الكريم
يؤمن بنفسه ومواهبه وقدراته اللي ربنا حباها اليه
الله سبحانه وتعالي سخر لنا الكون اجمع لنكون خليفة في الارض
قصتني بدات لما كنت تايهة مش عارفة افكر انا مين وهنا ليه !!
بس دايما الاسئلة دي مارحتش عن بالي وخيالي
انا مين!!؟
انا هنا ليه!؟
انا موجودة في الدنيا بعمل ايه!!
طيب فين رسالتي!؟
طول عمري بحس اني صاحبة رسالة
رسالتي اني اوجه الناس لحاجات مش شايفينها
اسيب اثر فيهم ولو صغير
ابقي من المؤثرين
اقعدت افكر طيب انا ممكن اعمل ايه وازاي!!
انا نورين صلاح الدين احمد
خريجة كلية علوم جامعة الاسكندرية
كان حلمي ادخل كلية صيدلية وطبعا زي ماكلنا عارفين الخيرة دايما فيما اختاره الله لنا
حبيت كليتي واجتهدت واتخرجت بس كان دايما بيراودني اسئلتي وبعدين!!
انا هنا ليه!؟
في اثري!؟
اتخرجت واشتغلت في كذا مجال مجال التحاليل الطبية
مجال تحضير المستحضرات الطبية في كلية الصيدلة
ولكن بردو انا بعمل ايه!!؟
هستفاد ايه
فين رسالتي !؟
فين اثري!؟
بكل قوة قررت اسيب مجال شغلي وبدون تردد اوندم
سمعت كلام كتير محبط
انتي يعني عاوزة تشتغلي ايه!؟
هتشتغلي وزيرة!؟
مسمعتش لكلامهم فكرت في نورين هي وبس اللي هتدلني
واخيرا لاقيتها
رسالتي وقصتي واثري
طيب ازاي!؟
لقيت ده من خلال دراستي لمجال التغذية وعلم النفس
درست كورسات كتير في التغذية وعلم النفس في امريكا ولندن
ومن مصر كمان
اشتغلت علي نفسي كتير اوي اوي
عشان اقدر اخرج للناس بالرسالة والاثر
فقدت من وزني حوالي ٢٥كيلو
اصبحت اخصائي تغذية علاجية في اشهر عيادات الاسكندرية
قدرت اغير حياة مئات الناس انهم يحققوا هدفهم ويوصلوا لصحة نفسية وجسدية سليمة
قدرت اسيب اثر بسمع رسايل بتفرح
ناس حياتهم اتغيرت بفضل الله انه جعلني سبب
وبدات نشاطي علي الفيسبوك والانستجرام بيتابعني الاف الناس
ومرشحة لتقديم برنامج تلفزيوني طبي علي القنوات الفضائية
وحاليا بحضر ماجستير التغذية العلاجية في جامعة القاهرة
انا اتغيرت بقيت نسخة احلي مني
دايما بحبني كانسان لكن بعدل وبغير سلوكياتي اللي مش صح وارجعها للفطرة اللي فطرنا عليه ربنا سبحانه وتعالي
وبقيت دكتورة نورين صلاح الدين
ولسة مكملة وهكمل وهسيب اثر وهاثر
