كل يوم حلم جديد

انا شيماء عندي ٤١ سنه .. هبدأ قصتي بحلمي من زمان زي أي طفله بتحب الرسم ومن اول ما اتغرست فيه موهبتي وانا بحلم ادخل كلية الفنون الجميله وبصراحه مكنش حد بيشجعني على هوايتي ولا حتى امي وكانت دايماً تقولي يعني هتتخرجي تشتغلي ايه!!؟ مكنتش في مخيلتي هشتغل ايه قد ما كنت نفسي امارس موهبتي واستمتع بيها .. وبالفعل حققت حلمي الاول ودخلت كليتي اللي اعتز بيها وبعدها بدأت اطور من قدراتي واحده واحده ودخلت الاي تي اي منحة وزارة الاتصالات والحمدلله اخدت افضل مشروع تخرج كان ويب سايت خاص بمسرح القاهره للعرائس وكان دايماً حلمي بيتجدد وكل فتره بيبقى في هدف اكبر اشتغلت في المتحف المصري الكبير كمصمم جرافيك من حوالي ١٥ سنه واترقيت حالياً بقيت مدير وحدة تكنولوجيا المعلومات .. كنت دايماً مش بدور على شغفي في كل فتره وبس لا .. كنت دايماً اسأل نفسي ايه اللي هتميز فيه عشان اقدر اقدمه للناس .. وزرعت ده في ولادي من بعدي وفرحت اوي اما لقيت ابني عنده موهبة الغناء مترددتش لحظه اني انمي فيه موهبته وجريت هنا وهناك ودربته ودخلته اكتر من مسابقة ومهرجان وكنت في ضهره دايماً عشان كنت مفتقده الاحساس ده ان حد يدعم موهبتي لحد ما الحمد لله اخد كذا جائزه منها مهرجان الموسيقار هاني شنودة لاغاني الاطفال ومهرجان الطفل المبدع الرابع التابع لوزارة التربية والتعليم وتالنت بالعربي جولدن كيدز التابع لوزارة الشباب والرياضه وكان من الطلائع المتميزين في برنامج عيشها مزيكا التابع ايضاً لوزارة الشباب والرياضه الحمدلله والشكر لله في وقت لا يتعدى السنه في موهبته الصغيره ومش بس كده دخلته فريق كورال ميوزيك أكاديمي وده فرق معاه كتير اوي وحولته من مجرد طفل ماسك الموبايل ال٢٤ ساعه لفنان جميل قد ايه فخوره بيه هو واخته والحمد لله نجحت في حلمي اللي اتنقل لولادي واصراري على تميزهم ونجاحهم في موهبتهم. كل يوم بيتجدد فيه حلم وهدف والحمدلله اصراري علي تحقيقه بيخليني مستمتعه جداً برحلة تحقيق الهدف  وطول ما انا لسه عايشه هفضل احلم بحلم جديد

شاركي من هنا

مقالات ذات صلة