حلم اميرة

انا اميره . محافظه المنوفيه.ادارة قويسنا عندى ١٤سنه
انا عايشه فى قريه اسمها منشاه دملو
قريه صغيرة ومحدوده الامكانيات جدا
يمكن مثلا لو احتاجت ادوات للرسم لازم اروح المدينه اللى جنبنا بتاخد تقريبا نص ساعه او ساعه الاربع علشان بس اجيب ادوات .
انا بحب الرسم من صغرى
دايما بكون مبسوطه اووى لما ارسم رسمه والاقى قدامى رسمه حقيقيه
كنت لما اكون زعلانه بشوف فى ايدى ورقه وقلم من غير ما افكر
اقعد افكر وارسم والون
الفكرة كانت فى دماغى دايما وكنت برسم كل حاجه فى محيط بيئتى
فى يوم سمعت اغنيه ام الدنيا لمحمد حماقى وكانت على فيديو ناس فرحانه وشايله علم مصر وفهمت بعد كده ان دى كورة وانهم كانوت بيمثلو منتخب مصر
قلت لنفسي هو انا ممكن اكون كده …بس انا مش بلعب كورة …بس برسم ..هل فى يوم من الايام ممكن احس الاحساس ده بس انا اللى عاملاه .
هل ممكن اكون اميرة واحقق ذاتى واثبت نفسي قدام الدنيا كلها
ومرت الايام وانا متمسكه انى ارسم واطور من نفسي
انا ماخدتش كورسات ولا كان فى حد يساعدنى بس انا كنت مصرة انى اثبت ان القرى ممكن يطلع منها ناس كويسه
بدات اجيب صور واقول انا هوصل للمستوى ده واجرب مرة واتنين وتلاته
واشوف الاخطاء اللى بقع فيها واصلحها فى اللوحه اللى بعدها وبعد كده الاقى اخطاء تانيه فاصلحها وهكذا
وقدرت احقق حاجه بسيطه من حلمى
اخدت المركز الاول على مستوى الجمهوريه فى مسابقه تالنت بالعربى مجال الفنون التشكيليه لدورتها الاولى
والمركز الاول على مستوى الجمهوريه فى مسابقه الطفل المبدع وانا حاليا مشاركه فى مسابقه المبدع الصغير تحت رعايه السيده الفاضله انتصار السيسي حرم معالى رئيس الجمهوريه
والمركز الاول على المحافظة فى مسابقات رسم كتير
وغير ده انا شاركت فى مسابقه تخدى القراءة العربى وفرسان القراءه واخدت مراكز اولى على المحافظة ومراكز على الجمهوريه

كنت نفسي حد يهتم بموهبتى ويدعمنى
وحاولت اكتر من مرة انى اطلع للنور وطلعت مع المذيعه داليا اشرف على قناه دى ام سي فى برنامج ٨الصبح
وكل ده جزء صغير جدا من اللى نفسي احقفه
انا اتحديت كل العوائق اللى واجهتها لوحدى
وبتشجع بابا وماما ليا
ثم تشجيع الدوله لينا
انا نفسي احقق حاجه على المستوى العالمى
واحس احساس تمثيل مصر فى العالم
واثبت للناس انو مفيش مستحيل وان ممكن حد يمثل مصر على المستوى العالمى من قريه عادى
وان كل الناس تقدر تعمل كل حاجه رغم السن ورغم الظروف