حكايتى مع ابنى عمر من ذوى الاحتياجات الخاصه

انا ضحى خريجة الجامعه الامريكيه قسم التسويق كنت من الاوائل علىً دفعتى وكنت بشتغل مديرة التسويق فى شركه من اكبر الشركات المالتى ناشيونال فى مصر
لما عمر ابنى بقى عنده سنه اكتشفنا انه بيعانى من الشلل الدماغي وانه هيحتاج رعاية خاصه وهنا ماترددتش انى اسيب شغلي اللى الحمدلله كان بدأ يبقى ليا فيه اسم كبير فى مجال التسويق فى مصر وتفرغت كاملا لرعاية ابنى عمر اللى بدانا نديله جلسات مكثفه سواء للعلاج الطبيعى او التخاطب او تنمية المهارات فى رحلة طويله وجميله حسينا فيها برحمة ربنا ورعايته لعمر بفضل الله فى كل خطوه.
بعد كده بدات اجمع افضل دكاترة علاج طبيعى وتخاطب وتنمية مهارات علىً اد مااقدر وعملت مركز للعلاج الطبيعى وتنمية مهارات الاطفال من ذووى الاحتياجات الخاصه زى عمر ابنى ( مركز خاص لا يهدف للربح ) الحمدلله بنكبر كل يوم قدرنا من خلال المركز ده نحاول نقدم خدمة طبيه ناجحه واحترافيه للاطفال دول ولاطفال كتير تانيه من ذووى الاحتياجات الخاصه من دور الايتام وغير القادرين بمساعده الاباء القادرين اللى عندهم طفل ذو احتياجات خاصه ويقدر يكفل طفل ذو احتياجات خاصه واهله غير قادرين فىً روح طيبه وجميله يارب نقدر نكمل فيها ونخدم اولادنا وبفضل الله بنفرح بكل خطوه جديده حتى لو صغيره بيقدر طفل يخطوها لاول مره بعد مجهود كبير منه ومن اهله ومن دكاترته الحمدلله
وبنقدر من خلال المركز ده كمان نقدم الدعم النفسي للاهالي الصغيرين اللى لسه مكتشفين التحدى الجديد اللى ربنا كرمهم بيه ومش عارفين يبدؤا منين لاننا كلنا مرينا بالمرحله دى وكنا تايهين فى الاول لغاية ماربنا بكرمه مهد لينا الطريق برحمته
الحمدلله كل ما نعرف ان فيه خبير اجنبي فى اى مكان يقدر يساعد ولادنا بنستضيفه فى المركز ونقدم ورشة عمل نعلم فيها الدكاتره ونحاول نساعد ولادنا بحاجه جديده بنفس المبدا ان القادرين يساعدوا الغير قادرين بحيث ان ولادنا كلهم يستفيدوا والدكاتره تتعلم تكنيك جديد او اسلوب علاجى جديد فى مجالهم ينفعوا بيه الاطفال ان شاء الله
بنشتغل دلوقتىً ان شاء الله اننا نعمل اول جمعيه خيرية لرعاية اطفال الشلل الدماغي وذووى الاحتياجات الخاصه فى مصر يارب ينفع بينا ان شاء الله.
الحمدلله اولادنا بيتحسنوا حتى لو ببطء لكن الحمدلله احنا فرحانين بيهم وبنساندهم وبنقول يارب يقدرنا فى اللى جاى يارب

شاركي من هنا

مقالات ذات صلة