انتي بنت.. جربي

انا اسمي اوليفيا، عندي ٢٢ سنة، لما القصة دي تكون اتقرت، هكون خريجة هندسة مدني. في فترة اعدادي لحد فترة كلية كنت جزء من عدة مبادرات، معرض العلوم و الهندسة الدولي من فترة ٢٠١١ لحد فترة لحد ٢٠١٦. المرتمر الافريقي الدولي الأولي لريادة الاعمال ٢٠١٨, معسكر القيادات الشبابية في نفس السنة، مدرب في معسكر روبوبتاك التابع لوزارة الشباب و الرياضة لعام ٢٠٢٠, و مؤتمر الشباب المصري الروسي الأولي ٢٠٢١. و حاليا جزء من برلمان الشباب. دي بس اهم المقتطفات من الانشطة المحلية و الدولية اللي شاركنا بيها. و الحقيقة حابة كلامي يتوجه للبنات اللي في سن المراهقة و في الكليات.
كتير ما كان بيتقاللي كلمة “انتي بنت” كنوع من انواع السخرية لما كنت بقرر اني اشترك او اجرب حاجة جديدة لأول مرة، انتي بنت كان معناها. انتي ازاي مش مكسوفة تقفي و تقولي رأيك قدام ناس اكبر منك قيمة و قامة؟ انتي ازاي تشتغلي في مشروع مع اولاد من غير تردد؟ ازاي مش خايفة تفشلي في اللي انتي بتعمليه؟، و الحقيقة كلمة “انتي بنت” سواء صريحة او بشكل غير مباشر، هي اللي استفزتني اجرب كل حاجة جديدة، ارفع ايدي بعد كل محاضرة علشان اسأل، اخاطر حتي لو المخاطرة كبيرة لو في امل ١٪ اني اتعلم حاجة جديدة.
انتي ايه اللي عرفك بريادة الأعمال؟ ايه اللي جاب الهندسة للبرمجة؟ مش مدني صعبة شوية علي البنات؟.
كل كلمة من دول كانت بتتقال في سبيل الهزار و التريقة لكن حقيقة، كانت ترسيخ لفكرة ان البنت مش مفروض تقف و تتكلم بصوت عالي لأن دي من مش من شيمة “البنت”. “البنت” اللي مفروض تكون خجولة و قاعدة في ركن من غير صوت، بتاخد اقل المخاطرات الممكنة, لأن المخاطرة “صعبة علي البنت”.
الحقيقة انا قبل ما اشترك في مبادرات ريادة الأعمال مكنتش اعرف حاجة عن ريادة الأعمال، و قبل ما اشترك في مؤتمرات متعلقة بالبرمجة مكنتش اعرف حاجة عن البرمجة، وقبل ما ادخل هندسة، تعليقات كتير كانت بتتكلم عن صعوبة هندسة. و فعلا في كل مبادرة او قرار خدته اني اتعلم حاجة جديدة كان فيه سنة خوف، قلق، طيب لو فشلت؟ لو احرجت نفسي بقلة معرفتي؟ لو مقبلوش بأفكاري و آرائي؟ لو لو لو. بس املي هو اللي دفعني اني اجرب حتي لو كنت هفشل او مش هطلع بنتايج كبيرة، لمجرد اني هتعلم، لما اخوض التجربة هكون شخص افضل، شخص عنده خبرات و معرفة، شخص قادر انه يتكلم و يبدي آراءه.
خلاصة قصتي، متخافشي انك تجربي حاجة جديدة، حتي لو في احتمال للفشل، متخافيش انك تتكلمي حتي لو مكانش فيه بنت تانية غيرك، متخافيش تعبري عن رأيك بلباقة و احترام، حتي لو شخص شايف ان رأيك غير ملائم لآراءه الشخصية.
“انتي بنت” مش المفروض تكسرك او تقلل منك، “انتي بنت” هي سر قوتك..