أنا عندي حلم وهيتحقق ، فمن يريد يستطيع .
اتخرجت من الجامعة وأتجوزت والحياة كانت صعبة جدا ..
أنفصلت ومعايا بنتين ..
عافرت ودورت ع شغل في كل مكان مرة في بنك مرة اعمل مشروع أبيع فيه ملابس اون لاين لحد ما عملت تعاقد في مستشفي ، بدأتها من ع البوابة بقطع تذاكر للمرضى، وبعدين طلعت فوق شوية وبقيت إدارية بقسم من الأقسام الداخلية وكل دا شغالة ع نفسي كورسات ومذاكرة مسكت مركز المعلومات وبعدها مسكت العلاقات العامة والإعلام وبعدين مسكت مدير مكتب مدير المستشفي ومسؤل تنظيم مؤتمرات بمديرية الصحة بالمنوفية ، أيام جائحة كورونا مكنتش بنام
كنت المسؤل الأول عن التواصل مع وزارة الصحة ، كنت المسؤل الأول إني أنقل للناس طاقة إيجابية كنت المسؤل الأول إني أخلي كل دكاترة وتمريض المستشفي في حالة جيدة من كتر التعب والنفسية
الحمد الله وبفضلة كنت بعمل كل دا بحب اوووي ونجحت فيه لدرجة انه بعد الموجة الأولي من الجائحة تم انتدابي للعمل مسؤل علاقات عامة وإعلام لمكتب محافظ المنوفية. تطوعت في حياة كريمة
نزلت ولفيت وشوفت وتعاملت مع كل الناس ومازلت بشتغل ع نفسي
أخدت دورات تدريبية كثيرة جدا وعندي عشم كبير جدا إني هوصل لحلمي في يوم من الأيام
الحياة صعبة بس أنا قدها وعمري ما شوفتها غير سهلة .
عملت كل حاجة بمجهودي ، كل مكان وصلت له بتعبي وتفكيري .
وعندي يقين إن ربنا عنده كل الخير .
