بنت مش فاهمة

انا اصغر واحدة لست اخوات ولدين واربع بنات وابويا توفى وانا عندي سبعة سنوات امي ربتني على مخافة الله وكانت تقولي ربنا هو ابوكي ومفيش حاجة طلبتها منه والا وعطهاني حتى المرض انا طلبته منه واداهوني .
دخلت كلية الفنون الجميلة قسم عمارة وفي السنة التالتة اتخطبت لاخو جوز اختي وانا مش عارفة ليه اختارني لانه بيعمل علطول مشاكل معايا و الحياة كانت فعلا صعبة ولكن تم الزواج ومن شدة المعاملة وقسوة الحياة طلبت من ربنا أنه يخلصني من الحياة دي بأي طريقة حتى لو كان هيديني سرطان
بعد 11 سنة زواج طلب الانفصال مع اكتشاف المرض وهو زاد في قسوته .
علاجي مكنش بسيط وفي نفس الوقت مش اصعب شئ ركبت جهاز البورتوكاس وابتديت العلاج اخدت اربع انواع كيماوي 16 جلسة و9 حقن تحت الجلد و20 جلسة إشعاع
في وسط خوف وتعب العلاج يجي ضغط الانفصال وكمان حرقة فراق امي وانا في الجلسة الرابعة من الكيمو .
لقيت مفيش بيت اروحه وانا مرتاحة مسئولة عن طفلين وابوهم ضاغط بكل ما يملك من قوة عشان يكسرني ومفيش ام أو أب اتسند عليهم في شدتي .
بس ربنا في وسط دا كله اداني اخوات خايفين عليا وبيعاملوني على اني بنتهم خلصت علاجي وبقيت احسن وبقيت فاهمة كل واحد بيتعامل معايا عايز مني ايه
ربنا عطاني ولاد صغيرين لكن فاهمين ومتحملين المسئولية وبشكر ربنا على كل لحظة كان ساندني فيها
اللي بره مش شايف ربنا بيعمل معانا ايه لكن اللي جوه عارف ربنا عامل معاه ايه