شاركي قصتك
تحديث قبل 3 سنوات، شهر 1 الأعضاء · 1
مشاركة 
امتي؟!
من 11 سنه بالظبط من يوم 22/3/2010 كانت مشكله بسيطه زي اللي بتحصل ف اي بيت ام واب بيتخانقوا قدامهم بناتهم الكبيره 12 سنه والصغيره 10 وابنهم اللي عنده 5 سنين كُنا عيله سويه متوسطه مكناش اغنيا بس مش فقرا ماما كانت مثال ست يُحتذي بيه فعلا اتجوزت ابويا وهو صغير محلتوش حاجه وقفت جنبه وبدأت توفرله وتشيل “حرفيا” اللقمه من بؤها وتديله هو وتحوشله لحد ماجابتله ارض وقتها محدش ف عيلته ولا عيلتها كان عنده ارض! ربتنا احسن تربيه مكانش يعرف حاجه عننا اكتر من اننا عايشين ده وهو معانا
ارجع ليوم 22/3/2010 يوم المشكله ماما راحت لبيت اهلها كرد فعل طبيعي بعد اي مشكله بين راجل ومراته فضلنا عند جدتي شهر والتاني لحد اليوم اللي جت في جارتنا وقالت لماما ان ابويا ابتدي ينزل عزالها كله م الشقه ولما ماما راحت اكتشفت انه مشي وانه باع الشقه وانه سابنا من غير حتي مايقول!
روحنا انا وماما واخواتي خدنا الشقه وضع يد وقعدنا فيه الغريب اللي اشتري الشقه طلع احن من ابويا وقالنا ان كلامه مش معانا ومع اللي باعلوا اللي لحد دلوقتي مشوفنهوش من يوميها امي كانت ست بيت ومش متعلمه متعرفش تشتغل وتعتمد ع نفسها زي كل بنات جيلها زمان لكن حاربت وحقيقي ماما حاربت حاربت ناس مبيرحموش من النظرات والتساؤلات حاربت واختارت تشيل هم تلت عيال وقتها كنا اطفال وهي لوحدها عندها 37 سنه مع انها كانت تقدر تتجوز وتعيش دي ماهو عمل ومحدش كان هيلومها انما ماما كانت شيفانا نجاتها وعوضها واديتنا كل طاقتها من غير ماااي مخلوق يبقي ليه علينا فضل بعد ربنا حياتنا اتدمرت واتبهدلت جوعنا ونمنا ع البلاط وتعبنا كتييير لحد مااختي بقي عندها 15 سنه واشتغلت جنب الدراسه حااجات خفيفه عماله ف مصنع حلاوه مولد ف الموسم بعدها بسنه اشتغلت انا كعماله ف مزارع ومحطات تعبئه وتصدير الفاكهه سنه وف وسط كل ده مشوفناش ابونا والسنين جريت بينا وبنشقي وبنقسي اكتر وبنكبر وهو لا رحم ولا ساب رحمه ربنا تنزل بعت لماما ناس يشوهوها ويدلقوا عليها مايه نار وحصل فعلل ودلقوا عليها مايه نار ع رجلها وحصلها نسبه عجز اكتر من 30% ورفعت قضيه وللاسف موصلناش لحاجه ورفعت ماما قضيه نفقه وبردوه لعب ابويا ف مفردات مرتبه اللي معدي 6000 جنيه الي ان يخفضها لحوالي 3000 جنيه وبما ان في بيت تاني ف اتحكملنا بملاليم كل شهر بس وقتها احنا كانا محتاجين ف قولنا اهي نوايا تسند الزير
عدت الايام سنه ورا سنه ومعرفش ازاي؟! لحد النهارده بعد سنين شقا وذل ومرمطه لكن امي ف ضهرنا وحافظت وهي عاجزه ع اننا نتعلم ونكبر نضاف بسمعه وسيره طيبه وسط الناس وربتنا تربيه تخلي كل اللي يعرفنا او بس يسمع عناا يحلف بيها ودلوقتي بعد ماسبنا عيال مذلولين ليه ولقرشه وبعد ماعجز امي ورماها معهاش حتي فلوس ترفع قضيه طلاق بعد مارفض يطلقها عشان ميدفعش مؤخرها وبعد ماانا لفيت ع الجمعيات وبيوت الخير وشحت واشتغلت وعانيت وبعد مااختي جالها من الضغط النفسي شلل نصفي لفتره وبعد ماامي جالها السكر وحياتنا كانت باظت!
ربنا مسبناش وماما ف ضهرنا واهوه النهارده هو كبر وعجز وخلف بنت صغيره من مراته التانيه ياعالم هيعيش يربيها ولا لا انما لحنا والحمدلله انا ف تانيه جامعه واختي ممرضه ف مستشفي خاصه كبيره واخويا ف اولي ثانوي وفرشنا شقتنا وبنلبس احسن لبس وبنخرج وناكل ونشرب ومبسوطين بوجود امي وقوتها اللي بتقوينا
وماما بتتعالج ووقت ماتتعب بنكون تحت رجلها انما هو لوحده ولسه الزمن هيجي واحنا هنكبر اكتر سناً ومقاماً وهو هيحتاجنا مش هيلاقينا هنكون تحت رجل الست اللي بغباؤه وطمعه وانانايته شوهها وذلها وكسرها ورغم كل ده كبرتنا وخليتنا احسن ناس ف الدنيا وبشهاده اي حد اتعامل معانا
ليه؟!
حقيقي معرفش هو ليه عمل فينا كده وازاي هُنا عليه لكن كل اللي اعرفه
ان عند الله تلتقي الخصوم وانا مش مسامحه
ويكفي قول رسول الله
“كفى المرء إثماً ان يضيع من يعول”
صدق رسول الله ?
Viewing 0 reply threads