الرئيسية › المنتديات › شاركي قصتك › لسه عايشة
حاجة تخض انك تحكي حكايتك و تشوف نفسك ملهم و تواجه أكبر مخاوفك و تبوح .
مولودة برة بلدي و رجعت عندي ١١ سنة و مات اخويا الله يرحمه و ضرب البيت زلزال بابا انفصل عن الواقع و محدش حس بيه بقي عامل زي الإعصار إللي واخد كل حاجة في طريقه و انفصل عن ماما اللي في المقابل ما سامحتهوش و احنا بالتبعية رغم تحملها العبء كامل اللا إنها ماكنتش شايفة حد وجعها بس هوا إللي بيحرك حياتنا و ده شيء صعب و مدمر ان الوجع هوا إللي يكون قائد السفينة لإن اذا كان الوجع هوا المحرك فالخوف هيسكن و يعشش .
كبرنا و تجاوزنا بشكل أو بآخر و اتجوزنا من غير بابا من غير سند و ضهر و الإحساس ده وحش قوي و خصوصا لما الأم بتبقي عايزة تخلص من وجع القلب اللي هوا مهما يجري لازم نعيش و نتحمل ما هي خلاص أدت رسالتها.
لكن انا اتجوزت و اتطلقت و كان طبيب نفسي و جالي حالة نفسية هتصدقوا انا تعبت ٩ سنوات بمرض نفسي و خفيت و معرفتش بالظبط كان عندي إيه
دكاترة قالوا كلام و دكاترة قالوا كلام شوية إضطراب ثنائي القطب شوية اكتئاب شوية انهيار عصبي و أخدت كمية علاج فظيعة .
و اتجوزت تاني البني آدم الوحيد إللي كان مصدق اني مش مجنونة و كان اول مرة يتجوز و ربنا أهداني ابني الوحيد جوازنا ماكنش سهل و الظروف كانت صعبة جدا حتي ولادة ابني الوحيد كانت صعبة جدا و تقريبا كنت هموت و عملت عمليتين بعد الولادة علشان الأضرار اللي اتسببت فيها الولادة .
انا لسه عايشة
بحلم و بكتب و بغني و اخت كبيرة و عمة و خالة و صديقة و ابنة و ام و زوجة و عندي كل الأمل في ربنا و الحياة.
?? علي فكرة انا كاتبة و شاعرة و مطربة بس كل المواهب دي كنت بستخبي فيها من نفسي انا هنا نفسي و ده إنجاز
صباحكم فل وياسمين ??