الرئيسية المنتديات شاركي قصتك الحياة اختيارات وقرارات

  • شاركي قصتك

    نورا تحديث قبل سنتين، 12 شهر 1 الأعضاء · 1 مشاركة
    • نورا

      مشارك
      3 أبريل، 2021 الساعة 1:25 ص

      عرفت شغفي وحلمي من الطفولة وكنت بلعب مع بنت عمي وأعمل نفسي مذيعة.. مكنتش الطفلة لما
      حد يسألها نفسك تطلعي إيه فتجاوب دكتورة ولا مهندسة.. ولما جت مرحلة
      اختيار الكلية كتبت إعلام القاهرة رغبة أولى وقد كان واتخرجت بتقدير
      امتياز مع مرتبة الشرف ولما اتخرجت اتدربت في روز اليوسف كمحررة في قسم
      الثقافة بالموقع بس مكنتش لاقية نفسي خالص لدرجة إني سبتها بعد حوالي شهر
      أو شهرين بالكتير.. وبعدين درست دورة مراسل تليفزيوني في وكالة أنباء
      الشرق الأوسط وتم اختياري وقتها أنا وولدين وبنت عشان نلتحق بقسم الفيديو
      واشتغل كمراسلة.. وخدت بقى ورش كتير منها في التحرير لاونج زي التصوير
      الفوتوغرافي وصحافة الفيديو والموبايل وحصلت على منحة الاتحاد الأوروبي في التصوير
      الفوتوغرافي.. واشتغلت صحفية فيديو في جريدة الوطن لمدة 4 سنين وبعدين قررت
      إني أسيب شغل الشارع والصحافة عشان مكنش هدفي من البداية وكنت واخداه
      مرحلة أقدر بيها أحقق ذاتي وأعمل الحاجة اللي بحبها وهي التصوير عشقي
      وفي دمي.. وبعد ما سبت الشغل درست إخراج في قصر السينما وعملت فيلمي
      التسجيلي “الخطاط” وشاركت بيه في ملتقى المحاولة بقصر السينما وخدت جايزة
      جمهور عنه في مهرجان يوسف شاهين للأفلام الروائية والتسجيلية القصيرة
      واتعرض كمان في دار الأوبرا المصرية ضمن برنامج السينما المستقلة وشارك
      في المهرجان القومي للسينما المصرية الدورة 23 الحالية.. وشاركت بصورة
      سفاري سيوة في معرض “فرح الفوتوغرافيا”.. وشاركت في المعرض الافتراضي
      التابع لدار الثقافة البئر الأحمر بتونس مرتين في المرة الأولى كان فئة
      التراث وشاركت بصورتي لبرج القاهرة والمرة التانية كانت فئة البورتريه
      وشاركت بصورة لطفلة في دهب.. وشاركت في ملتقى ألبوم الوطن الثاني فئة
      البيوت القديمة بصورة لبيوت جزيرة هيسة بالنوبة وصورة بيوت شارع المعز
      وصورة قصر المنتزه.. كمان شاركت في المعرض الافتراضي الخاص بعيد المرأة
      2021 التابع لاتحاد المصوريين الجزائريين بصورتين لبائعة الأعلام.. وتم
      نشر صور ي في موقع جريدة المصري اليوم زي صورة الحياة البسيطة في سيوة وصور
      الأطفال.. وتم اختيار 6 صور من تصويري في ورشة الألوان التابعة لمنحة
      نادي إن فوكس ضمن أفضل المشاركات.. وتم اختيار صورتي عن رمضان ضمن أفضل
      مشاركات في صفحة مهتمة بمجال التصوير اسمها
      life street photography

      ولإن الشغف ما بيقفش والأحلام
      بتتجدد عملت صفحتي للهدايا التذكارية ودي عبارة عن تابلوهات بصور مصوراها
      وكوسترات وكروت وميداليات وبوسترات بجانب شغل هاند كرافت وعندي لقاء تليفوني مع قناة
      dmc في برنامج 8 الصبح بتكلم فيه عن شغلي وفكرة صفحتي ونزل موضوع عني في
      موقع النهار اللبناني وعن صفحتي وكمان فيه فقرة عن رحلتي وتم استضافتي على الهواء بقناة النيل الثقافية.. وكتبت كمان موضوعات ونزلت بصوري على
      موقع سياحي اسمه Travel post online

      ولسه فيه كتير إن شاء الله دايمًا
      عندي إحساس بكده وممتنة لرحلتي برغم إن شايفة لسه ما عملتش حاجة أو اللي
      عملته عادي ومحتاجة اتطور أكتر واشتغل أكتر وأكتر
      الرحلة دي مش كلها وردي وفيها
      تعب وأوقات إحباط بس بحاول ما استسلمش وأكمل طريقي ومش عايزة حياة
      روتينية عادية نفسي أسيب أثر طيب والناس لما تفتكرني وتجيب سيرتي تبقى
      بكل خير وإيجابية
      وأنتوا كمان اتمسكوا بشغفكم وحققوا أحلامكم لو صدقتوا في نفسكم الناس
      هتصدقكم

Viewing 0 reply threads
الرد: نورا
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن