الرئيسية المنتديات شاركي قصتك يزن .. طلع المارد اللي جوايا

  • شاركي قصتك

    Safa تحديث قبل سنة، 8 أشهر 1 الأعضاء · 1 مشاركة
    • Safa

      مشارك
      30 مارس، 2021 الساعة 3:01 م

      قصتي ممكن تبقى طويله وفيها تفاصيل كتير .. بس هاقول اهم حاجه فيها

      اسمي صفا المهدي وام يزن من متلازمة داون .. قصتي معاه طويله وجميله وكلها تحدي من شمال سيناء وحتى القاهره

      شغفي وحبي في مجال الفويس اوفر والدوبلاج والكتب الصوتيه والهندسة الصوتية والمونتاج ومع يزن كل حاجه بقه ليها طعم مختلف ..

      اخدت دبلومة تخاطب ودلوقتي يكمل دراسات عليا في كلية علوم إعاقة جامعة الزقازيق أول جامعة متخصصة لذوي الهمم على مستوى الشرق الأوسط .. عايزه اعرف كل حاجه ليها علاقه بإبني عشان اعرف تساعده يكون احسن

      عملت قناة على اليوتيوب اسمها YZN kids network

      هدفي أن الأطفال يتعلموا من يزن ومن مغامراته عملنا حلقات كتير عن الألوان والأشكال والحيوانات ولادنا يقدروا يعملوا حاجات كتير مميزه بس دايما محتاجين فرصه …

      وشغفي مارسته وعملت تسجيلات صوتيه لدعم امهات ذوي الاحتياجات الخاصة ..

      وعملت دوبلاج انا ويزن باصواتنا لكرتون هو بيحبه

      عمري ما حسيت أن يزن عطلني بالعكس يزن كان سبب رئيسي أن أطلع المارد اللي جوايا واعمل حاجات مكنتش متصوره اني ممكن اعملها في حياتي ..

      قصتي بالتفصيل اهي ..

      اسمي صفا المهدي عندي ٤٣ سنه .. من جيل الثمانينات الجميل، من مدينة العريش بشمال سيناء، اتجوزت وعندي ٢٣ سنه وعندي ٣ أبناء الاول انس والثانية حلا … قصتي وحياتي تحولت واتغيرت بعد ما نورني يزن اللي ربنا رزقني بيه بعد أخته بعشر سنين .. يزن اتولد في شمال سيناء عام ٢٠١٤ وده كان وقت صعب جدا في المنطقة دي وكان جيشنا بيحارب الإرهاب وكان فيه حظر من الساعه ٥ مساء وحتى ٦ صباحا … في الوقت ده تعبت جدا وجالس طلق وانا بولد قيصري.. وبما أن فيه حظر كان صعب ان اي حد ينزل الشارع لكن الوضع كان أكبر اضطررنا نتسحب بين العمائر والمباني لغاية ما وصلنا المستشفى اللي كانت لحسن الحظ مش بعيده عن البيت … وهناك يتولد يزن واتولد معاه من جديد .. يزن داون سيندروم ولما عرفت حمدت ربنا على النعمه وكنت خايفه يكون عنده مشاكل في القلب لاني معلوماتي أن دايما عندهم مشاكل في القلب وبما أن الوضع هناك كان صعب نزلت بيه القاهرة وبالفعل طلع عنده قالوا أو رباعي القلب وده عباره عن ٤ مشاكل في القلب وبيحتاج قلب مفتوح بعد ما يتم سنه ونص …. وكانت اصعب سنه ونص عدت عليا لان بسبب إقامتي في العريش كنت يضطر كتير انزل بيه انا وباباه بالاسعاف للقاهرة بسبب الأزمات القلبية الشديده وكل مره الدكتور كان يقولي استودعيه ربنا كنت بحس من جوايا أنه هايعيش وفعلا … عدت السنه ونص وعمل العملية والحمد لله .. لكن لسه مشوارنا طويل استقرينا في القاهرة وبدأنا المشوار .. يزن انهارده عنده ٦ سنين ولسه احلامنا كتيييير .

Viewing 0 reply threads
الرد: Safa
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن