شاركي قصتك
تحديث قبل 3 سنوات، شهر 1 الأعضاء · 1
مشاركة 
امتي؟
من ٦ سنين…كان عندى ٢٢ سنة ..
اتخرجت من مكان محترم المعهد العالى للفنون المسرحية
مكنتش عارفة انا مستنيني ايه فى المستقبل لانى كنت فى علاقة زى ما سموها دلوقتي toxic ..كنت بنت مقفول عليها جدا من اهلها…و الشخص اللي كانت بتحبه كان عايزها متحلمش…ومتفرحش…و متخططش لمستقبلها كمان….كان خايف لو سابها تحلم تطير….بس مكنش عارف انه بيقتلها….
اتخرجت وانا أحلامى كلها مصبوبة اني اشتغل شغلانة من ٨ الصبح ل ٢ الضهر و اتجوزه…. فى نفس تخرجي وانا فرحانة بنجاحي سابني….
لحد هنا القصة كئيبة و هبلة…و لكن هتحلو..
لسنة بعد اللي حصل ده كأني خرجت من قمقم…فجأة اكتشفت اني شخص بلا حياة اجتماعية ولا أحلام عملية…ولا حتي هدوء نفسي يخليني استغنى عن الحاجتين دول …
شخصية اعتمادية و محتاجة حب و اهتمام من كل الناس…اللي طبعا زهقوا بعد أن اسبوع نكد وعياط….
كان لازم انا اللي اسوق فى الرحلة دى لوحدي….
اتخبطت كتير ….لدرجة اني دخلت فى علاقة فاشلة تانية كأني بهرب من حياتي لحد تاني ….وطبعا لاني حتي مش فاهمة نفسي مقدرتش افهم ان الحد التاني ده مينفعنيش الا بعد ما كان الاوان فات و ارتبطنا….
خبطة تانية خلتني افوق لنفسي و أبدأ ارجع…اقول لا كفاية…
قولت لا …لان ده الدرس اللي اتعلمته…كلمة لا لازم تتقال لما تحس انك عايز تقولها…متأخرهاش..
بعدت…كنت فى نظر اهلي عيلة بتخبط وخلاص…قراراتها غلط …
قررت اشتغل…حتي ده كانوا شايفينه قرار غلط…
اشتغلت فترة …لحد ما بدأت احس اني منفعش موظفة….ف قررت اوفق بين شغلي و حلمي ….
ولما بقيت واثقة ف حلمي …سبت الشغل…و بدأت ارسم و اشتغل مسرح …
كنت و مازلت فى نظر كل اللي اعرفهم مجنونة…ازاى اضحي بوظيفة ثابتة مضمونة…واروح لحاجة يوم فيها فلوس و عشرة لا….
كل ما بتعب اوي ببص علي صورى من ٦ سنين و صوري دلوقتي واقول البنت دى لو مكنتش مرت بكل ده و قررت تتغير مكنش زمانها بقت مبسوطة……
مكنش زمانها قابلت كل الناس دى….ولا حققت أى حاجة …
مكنش زماني عملت ديكور ٧ مسرحيات لوحدي…
ولا اشتركت فى إنجاز فني واحد من اللي انا ساعدت فيهم حتي …..
مكنش زماني رسمت كل ده ….
مكنش زماني بقول الحمد لله ان كل ده راح عشان يجي غيره احلي …..
و مكنش زماني هنا بحكي قصتي
Viewing 0 reply threads