• شاركي قصتك

    بسمه تحديث قبل سنة، 8 أشهر 1 الأعضاء · 1 مشاركة
    • بسمه

      مشارك
      19 مارس، 2021 الساعة 5:40 م

      حكايتي يمكن حكيتها كتير جدا ودلوقتي مش عارفة أبدأها من فين أصل البدايات كتير وأول بداية كانت اني استعجلت آجي الدنيا …جيت بعد ٦ شهور وأسبوع بس من الحمل …مبتسرة ناقصة النمو …ساعتها كل الناس الدكاترة والعيلة …قالوا دي هاتموت الا امي …قالت لا هاتعيش ومن ساعتها …مافيش حاجة الحمد لله وقفتني لا الإعاقة والمرض ولا الخوف …بيقولوا عني شجاعة وانا شايفة أن الشجاعة انك تمارس خوفك من غير ما تبان خايف أو ضعيف …انا عشت سنين عمري الاولى مصابة بشلل دماغي …ومع كدة تفوقت دراسيا الحمد لله …لغاية ما دخلت كلية الاقتصاد والعلوم السياسية ..والمشوار بدأ لما اتخرجت …مافيش شغل وفيه إعاقة جسدية لكن عقلي شغال…بعد التخرج اتعلمت اللغة الفرنسية من اول مستوى لغاية ما بقيت باتكلمها وباكتبها كويس…بعد التخرج كتبت رواية وانتشرت صحيح ما حققتش انتشار لكن ده ما وقفنيش كتبت تاني وشاركت بقصصي في كتب جماعية ولغاية دلوقتي …اخدت ورش كتابة وباحاول وفي اتجاه الشغل ساقني القدر للشغل في شركة سياحة كبيرة فجأة من خمس سنين لقيت نفسي المفروض اتعلم مجال جديد خالص من البداية واتعلمت ورغم صعوبة الحركة بقيت اسافر بافواج رحلات وابقى مسئولة عنهم ونجحت …وفي الطريق ده ما نسيتش اني خريج علوم سياسيه اخدت دبلومة سجلت ماجستير وبعدها بسنين قدمت في البرنامج الرئاسي لتأهيل الشباب للقيادة دخلت الامتحانات مرة واتنين وتلاتة لغاية ما استقبلت وجوة البرنامج عرفت أن الكنز في الرحلة اكتشفت أني محاربة وان كل يوم مشوار جديد بيبدا اتعلمت ما اخافش سافرت لوحدي وعشت لوحدي انا المعاقة وبعد ما كنت باقول أن عاهتي آفتي واتكسف اتكلم عن اعاقتي بقيت شايفة أن انا صحيح معاقة لكن التعويرة اللي في رجلي خلتني اقوى وزي ما قالت لي اختي مرة انتي مش معاقة لأن ظروفك ما مانعتكيش عن حاجة لا شغل ولا دراسة ولا كتابة …انتي مقاتلة….انا مقاتلة!

Viewing 0 reply threads
الرد: بسمه
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن