شاركي قصتك
تحديث قبل سنتين، 6 أشهر 1 الأعضاء · 1
مشاركة 
لما قررت أدخل كلية فنون جميلة ،الكل عارضنى وفى ناس جتلنا من محافظات تانية علشان تقنع أهلى انى مدخلش الكلية اللى بحبها ، الكلية اللى كان فى 18 طالب امتحنوا قدرات وانا الوحيدة اللى جبت لائق سنة 2006 ورغم كل شئ صممت انى اروح الكلية واسافر من محافظة لمحافظة علشان احقق حلمى وفسنة تالتة كلية وكل تركيزى كان انى اخلص كلية واتعين معيدة او اسافر ادرس بره ، أهلى خطبولى واحد ومن غير مايرجعولى وافقوله مش هقدر اقول انهم كان فى نيتهم أذيتى لان دا ابعد من مقصدهم بس يمكن مكنوش على وعى بانهم بيأذونى وبعد أربع أيام اتكتب كتابى ، مراحل كتير مريت بيها خلال سفره بعد كتب كتابى بيوم وكل مشكلة كنت برمى بيها لوم على اهلى لدرجة انى رحت المدينة الجامعية ومبنزلش غير بعد دراستى ماتخلص وانعزلت تماما عنهم ورغم معرفة خطيبى ان اخوه كان بيتحرش بيا بس كان بيقولى ادارى ومقولش الغريب انى كنت شخص جبان وبيخاف من اى حاجة لا قدرت افضح اخوه وقتها ولا قدرت اقول لأهلى علشان خايفة يغلطونى انا – ومرت الايام بعد مشاداه بينى وبين والدته واخوه ادركت ان دا بيت رعب مش بيت هينفع اعيش فيه وقررت انى اتمرد حتى على اهلى واحاول ارفع خلع على خطيبى او جوزى وهددته لو مبعتش توكيل هرفع خلع وهشتكيه فى قريته ولانه خايف من المجتمع بعت فعلا التوكيل وانفصلت بعد ماحصل حبة مشاكل بينت لأهلى معدنهم الحقيقى -طول مدة معاناتى معاه كان بابا وماما اولوياتهم كلام الناس وان بنتنا متبقاش مطلقة – قررت بعدها اكمل دراستى واعمل ماجستير وفعلا بدأت وناقشت 2018 وخلال السنين دى كلها ضغوط مبتعملش اى حاجة غير انها تعطلنى “لازم تتجوزى علشان الناس هتقول ايه” “الراجل اتجوز وخلف وانتى لسة ” ،وكأن حياتى دايما مرهونة بغيرى مش بيا انا او اختياراتى أنا – خناقات ومشاكل على ان افضل حل سليم للوضع اسيب دراستى وارجع اتجوز واعد فى البيت وان دا الامان والحماية -لحد دلوقتى بالنسبة لأهلى ماليش مخرج غير الجواز ومهما حققت من نجاح مفيش أمان ونجاح زى انى اكون أسرة طبعا مش هقدر أقول انى سوبر هيرو واتغلبت على كل حاجة الخناقات وعدم التفهم دا بيعطلنى كتير عن اللى عاوزه احققه دلوقت فى مرحلة الدكتوراه بس لسة محققتش اللى عوزاه وبعافر وبحارب فى كذا جبهة المجتمع اللى مش قابلنى غير فى شكل معين مش فى واحدة مستقلة عايشة لوحدها فى محافظة تانية بعيد عن اهلها وبتدرس – والرجالة اللى بيتعرفوا عليا وعاوزنى مكنتش اعرف حد قبلهم ويحوموا ويسالوا حوالين علاقة كتب كتابى كان شكلها ايه واطارها ايه – وجبهة دراستى وتحقيق حلمى وانى اشتغل وأعرف اوصل شغلى ورسمى للناس ورغم المشاريع الصغيرة الا انى لسة مقدرش انسب نجاح لنفسى لانى لسة مأثرتش على بنات كتير وقفها صراع ما هما عايشينه – دلوقتى أنا واحدة جديدة من 2010 بس لسة ناقسنى كتير علشان أكون راضية عن اللى حققته وكلام الناس بيأخر كتير وبيأثر خاصة لو مع حد بينازع علشان يتصدى للكلام زيى أكيد فى بنات أقوى منى بتعرف تتمرد بشكل كامل بس للاسف انا ضميرى ميسمحليش اسيب اهلى تماما او ابعد عن اى مصدر مزعج يلومنى على قراراتى زى أهلى ومهما أحاول ارضى نفسى وارضيهم بردو الموضوع متعب بس أكيد انى هفضل أكمل فاللى عاوزة أوصله وأحققه وبكل مافيا من قوة هحاول اتجاهل كلام الناس واغير فكر بابايا وماماتى لحد مااموت ولو مستوعبونيش يبقى على الاقل ميعارضوش سعى لمستقبلى بالطريقة اللى اشوفها صح .
Viewing 0 reply threads