شاركي قصتك
تحديث قبل 3 سنوات 2 الأعضاء · 4
منشورات 
انا يمنى دحروج بشتغل لايف كوتش متجوزه من حوالي ١٢ سنه .. مواليد ١٩٨٤
وعندي بنت اسمها ليلى ( محتضنه) انا ام بس بدون انجاب .. انا ماانجبتش بنتي انا كفلتها وهي بعمر التلت شهور
ومابين محاولتي اكون ام ولحد ما كفلت بنتي ” خوفت اوقات كتير يأست كمان اوقات اكتر ،، سمعت كلام قاسي من ناس حواليه اللي يقولي ( بتتحايلي علي القدر ) مش هتاخدوا الثواب
مساكين مابيخلفوش!
دخلت خلال ال٩ سنين زواج ٦ عمليات حقن مجهري والرد الدائم وابدا من الدكاتره ( معندكمش حاجه تمنع الانجاب ده قدر ) ربنا مش رايد .. ايامصعبه وليالي طويله بحلم اني اكون ام
واللي يخبي حمله عليه واللي يسمعني كلمتين اني ارضا بقضاء الله او اللي يقولي ( العيال هم وارف احمدي ربنا انا معندكيش )
كنت كل تفكيري انا عايزه ايه وشكل حياتي ايه لما اكبر
وردي الدائم نفسي في عيله كبيره واحفاد ودوشه وتجمع اخر الاسبوع وخناقات ثانويه عامه ..
انا قررت ان ماستسلمش واحاول احقق حلمي حتي لو مش من رحمي !
انا قررت اكون ام ونكون اسره انا ووائل زوجي
تقدروا تتدخلو علي لينكاتنا وتعرفوا اكتر عن مبادرتنا
بدات في فكرة الاحتضان في مصر كصفحة بسيطه جدا علي الفيسبوك تالت يوم كفالتي لبنتي ٢٧-١٢-٢٠١٨ ..
لما روحت مركز الصحه علشان اشوف الاطفال اكتشفت ان في اطفال كتير اطفال ماتشوفش شمس لمدة سنتين !
اكتشفت ان في اولاد كتير محتاجين حضن وبيت وبابا وماما ..
مخبيش عليكم مكنش ده الهدف بس من الصفحه?
انا كان عندي هدف شخصي وهو بنتي !
ليلى قررت انا ووائل ان مش هنكذب هنقول الحقيقه ان احنا مخلفناش احنا كفلنا بنتنا ..
بس وقتها سالت نفسي طيب انتي مش هتكذبي ! بس هل ياترى المجتمع والدنيا اللي بنتك هتكبر فيها تنفع ليها كطفلة محتضنه؟
والاجابه كانت لا لا وميت الف لا فاقررت اغير العالم لبنتي علي ما تكبر يكون العالم والفكر والعادات والافكار الغلط كلها اتغيرت
وبدأت من جوايا بالهدف ده
“بغير العالم لبنتي ”
واكتشفت وانا في الرحله اني بغير العالم لكل طفل مختلف ..
الصفحه بقيت مبادرة وكيان كبير فيه اكتر من ٢٠ شخص بيعملوا بشكل يومي ومنظم ومؤسسي
والصفحة بقيت مؤسسة تحت الانشاء
والكام اسرة اللي كانوا علي جروب الواتساب
بقو ٨٣٠ اسرة ❤️
والصفحه اللي بدات ب٣٠٠ شخص
بقيت ١١٠ الف متابع
وبقي في ورش
ومبادرة ارضاع
وقصص مطبوعه للاطفال حواديت عن الاحتضان
دكاتره متخصصين
وجروبات دعم نفسي
وقناة يوتيوب
وعالم ومجتمع
واخيراً
بقي في ” الاحتضان في مصر لكفالة الاطفال”
بااختصار
انا يمنى ام بالقلب مش بالرحم
انا ام ليلى ❤️
انا ام
انا كمان ام بالقلب ومشتركه ف المسابقه اتمنى حد مننا يكسب يايمنى
يارب ❤️
Viewing 1 reply thread