الرئيسية المنتديات شاركي قصتك ليه مبتتكسريش!!

  • شاركي قصتك

    Nahla تحديث قبل سنة، 8 أشهر 1 الأعضاء · 1 مشاركة
    • Nahla

      مشارك
      16 مارس، 2021 الساعة 11:05 م

      انا اتعودت طول حياتي اني اتعب واعافر لحد ما اوصل لحلمي وكنت بقول ان الشخص اللي هرتبط بيه عندي استعداد اعافر معاه ونعمل كل حاجه سوا.. لحد ما تزوجت شخص كان بيدور عليا بين الناس وصبر سنين لحد ما وصلي.. المهم واجهت معاه صعوبات الحياة من اول فقدانه لشغله وقت الثورة و رفضت اتخلى عنه بأسم الحب والوفاء وكنت واثقه فيه ثفه لاني كنت فاكره ان معافرتنا وصبرنا مع بعض في الحياة هي اللي بتبني حيطان متينه في حياتنا وللاسف لما لقاني بستحمل بقيت انا الشخص اللي بيرمي عنده همومه والحاجات الوحشه اللي بتحصل معاه وطبعا لما كان يقولي فقد شغل او وقعت منه فلوس كنت بتكسف اطلب زي البنات مصروف او لبس او اي متع تقديرا لظروفه حتى بنتي مكنتش بطلب منه حاجه ليها وكنت بحط مرتبي كله في توضيب شقه والدي اشتراهالنا لما راعينا ظروفه وبعد كده ظروفه اتحسنت وكنت بسافرله زيارات للامارات و ارجع وانا واثقه فيه لحد ما في مرة اداني تليفونه القديم ليا ومسح من عليه حاجاته لكن ربنا بيدي البني ادم فرص كتير يستره فيها لحد ما الانسان بيفتري وبينكشف ستره لقيت التليفون عمل لوحده استعاده لصور واكتشف انه عايش حياته فسح وعلاقات ولبس ماركات وانا زوجه موجوده محترمه بتصونه وشيالة الهموم وبس لدرجه اني لقيته متكلم عليا مع واحدة منهم اني مش قوي في العلاقة الجنسية وكمان باعتلها صورتي واكتشفت انه على علاقة حتى ببنات اعرفهم وبعتله كل الحاجات اللي شفتها وكل رده كان انه مش بيعمل كده بارادته وان فيه حد عامله سحر ان كل ما يبطل العلاقات الجنسية بيفقد عمله وطلب مني اديله فرصه علشان خاطر بنتنا لكن من اللحظه دي قلبي اتقطع مليون حته واتفتت. بعدها سافرت له و اقمت معاه لكني مبقتش نفس الشخص ولا ببصله نفس النظره بقيت عايشه لنفسي ولبنتي منعت الخلفه منه تاني لحد ما حصلت مشاكل بيني وبينه بسبب والزته واخواته و حرضوه على تركي معلقه في مصر وعدم الانفاق عليا وعلى بنته وفضلت عالحال ده سنه ونص مصدومه مقهوره مكسوره دموعي مبتقفش وهو عايش حياته وانا حياتي وقفت لحد ما بصيت لبنتي لقيتها حزينه و انا ضايعه في اللحظه دي كلمته قولتله اني صبرت سنه ونص لا عارفه اني زوجه ولا مطلقه فإما امساك بمعروف او تسريح باحسان لكن رده اتنازلي عن الشقه وانا اطلقك لقيت شريط الذكريات من كفاح معاه اخوف عليه اكتر من نفسي بيجري قدامي وانا شايفه الجحود وحتى انكر وقوفي معاه و رحت رفعت خلع وقطعت اجازتي ونزلت شغلي وقضيتها خروج كأني في غايه الانبساط رغم الحقيقه انا ضايعه ووحيده وقلبي مكسور لكن تظاهري بالقوه خلاه يقولي انتي ليه في المشاكل مبتتكسريش قولتله لما وقعت انت مسندتنيش لكن دوست عليا اكتر فليه انكسر وعملت بلوك ليه من كل حاجه واسمع انه راح اتقدم لفلانه وعلانه وسافر يتفسح في روسيا هولندا باريس وهو حارم بنته… انا الحمد لله انا وبنته مش محتاجينله ماديا بس انا مش مسامحاه على انه خلا بنتي يتيمه ونسيت اقول انه رغم اكتشافي لعلاقاته قال للناس اني سيئة السمعه وعلى علاقه بشخص وشوه سمعتي انا واهلي اللي وقفوا جنبه.. انا واقفه على رجلي وقويه لكن الحقيقه اني منتظره عوض ربنا عن كل وجع وتحمل ولكن لا استطيع ان ادعوا له بالهدايه ولكني ادعوا عليه ان ينكسر قلبه مليون مرة وان لا يجد الراحه.. بفضل الله انا اليوم ناجحه ولكني فقدت روحي السابقه واتمنى ان تعود مرة اخرى وتنفض الغبار الذي اتى عليها

Viewing 0 reply threads
الرد: Nahla
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن