الرئيسية المنتديات شاركي قصتك كفاحي مع الزواج والحياه

  • شاركي قصتك

    Amal تحديث قبل سنة، 8 أشهر 1 الأعضاء · 1 مشاركة
    • Amal

      مشارك
      29 مارس، 2021 الساعة 3:31 ص

      انا انسانه رومانسيه جدا جدا دايما مشاعري بتتحكم فيا اتجوزت جواز صالونات بس بردو عن حب أنا عمري ما كنت اتجوز ابدا الا لو كنت بحب الشخص ده اتجوزت بعد خطوبه 3 شهور بس عائلتي ناس بسيطه جدا مش ماديا لا فكريا رغم أن ابويا ضابط بالجيش وامي باباها كان راجل اعمال كبير إلا انهم ناس بسيطه في عدم خبرتهم بالحياه وطبعا هما ربوني أنا وأخواتي على كده معنديش خبره في اي حاجه كل كلامهم ملكيش دعوه بالناس متختلطيش بحد خليكي دائما خفيفه متدلقيش على حد كل كلامهم كده خايفين من الناس بابا راجل طيب جدا بيامن للناس بسهوله وميحبش حد يجرحه بكلمه راحل في حاله

      المهم اتجوزت جوزي بعد مشاكل في الخطوبه مش بسبب الفلوس لا بسبب اني طول الوقت فاكره أنه متجوزني وخلاص عشان عايز يتجوز أنا نفسي اعيش قصه الحب الي طول عمري يتمناها وهو مش مشجعني قلت بعد الجواز ونبقى مع بعض براحتنا بقا اكيد هحس بالرومانسية بدأت بقا قصه الحياه انسان مكنتش اعرف عنه حاجه الا بعد مرور 15 سنه على جوازي منه انسان الغموض مالي حياته كل حياتي دي بحاول ادي لنفسي عذر عشان اكمل معاه عشان بناتي أنا عندي بنتين منه بحاول اربيهم احسن تربيه جوزي مش في دماغه ولا بيت ولا عيال مكنش كده كان شويه وشويه كان الاول مفهمني أن احنا حياتنا شركه وبنبني مستقبل ولادنا مع بعض ولازم تفكيرنا يكون عن غيرنا من اهالينا إلا أن أنا كنت هبله لما صدقت بدأت اذاكر لبناتي واخد بالي منهم وهو يوفر الفلوس وانا قررت اشتغل لاني نفسي يبقى ليا الكيان الخاص بيا أنا معايا مؤهل عالي واشتغلت في مدرسه بعد كده قررت اشتغل من البيت بدأ يجيلي فلوس لاني لما بحط حاجه في دماغي بنجح فيها بدأ يقنعني أن الحياه مشاركه وأن احنا يكون عندنا عربيه ولازم نوفر دروس الولاد ومصاريفنا وانا اقول حاضر يشارك بقا في البيت وتكوين الاسره وفرحانه بعمل زي امي ما كانت بتعمل مع ابويا بدأت فلوس شغلي احطها في البيت وهو يوفر وفي الاخر اشترى احدث عربيه يقول عشان نستفيد بيها والواقع أن أنا وولادي مش لنستفيد ربع فائدته والاسم بتاعته أنا تعبي راح فين السنين دي راح في المشاركه عشان تبني كيان واحد بس راجل اناني بيتغذي على تعبك ونفسيتك ويضحك عليكي بكلمتين

      المهم بعد 10سنين من جوازي مكنتش لسه اشتغلت كان بيصرف عالبيت بس مشاعره بارده جدا معايا لو مطلبتش اهتمام عمري ما الاقاه لو مطلبتش يقربلي عمره ما يقرب حاجه منتهي الانانيه ليه بقا هو كده عشان من الاول أنا ورقي مكشوف واحده عايزه حضن وحنان كنت اروح اترمي في حضنه زي الهبله اول ما اشوفه اتعود على كده أقوله أنا نفسي احس انك بتحبيني زي ما بحبك يقولي مبعرفش اعبر مش عايز يبذل اي مجهود عشان يرضيني غير أن أي مشكله كان دائما محسسني أنه بايعني عمري ما فرقت معاه وبابا هو الي كان بيرجعني ليه إحباط احباط سنين مليانه هد وكسر نفس سكنت واحده جنبنا مش بتخلف اتقربت منها وبقينا نخرج سوا وبقيت اضيع وقت معاها لحد ما عرفت انها بتكلم رجاله في التليفون بتتسلى طبعا كل ده كان جديد عليا عمري ما شفته ولا اعرفه قبل كده حاجه غريبه بقيت لما احكيلها عن جوزي وعن الي بيعمله تقولي انتي الي راميه نفسك عليه متشغليش نفسك بيه خالص وهو هيجيلك راكع الراجل مبحبش الست السهله عملت زي ما قالتلي بقيت بتسلى معاها عشان اضيع وقت ومشغلش نفسي بيه ومكنتش بكلمه خالص لحد ما شك فيا لأن ده مش طابعي وراقب الكمبيوتر الي كنت بتكلم عليه انا وصاحبتي وعرف اني بكلم ناس شات طبعا لما واجهني وقتها كنت عند بابا والموضوع كبر ودخل في سكه طلاق وكان بناتي معايا عدى علينا واخدهم وانا مزهوله من الي بيحصل لاني مش متوقعه رد فعله أنا واحده متعرفش حاجه في حياتها غيره أساسا ولا عمرها اختلطت بالعالم الخارجي نهائي واهلها مفهموهاش الصح والغلط اه عارفاه بس بالنسالبي أن الخيانه الزوجيه هي أن أعرف راجل تاني واشوفه وكده أنا كان كل هدفي اني اتشغل عنه بس زي ما صاحبتي بتعمل طيب فاهمني غلطتي ولا الهوى بدأ بقا مشاكل مع عائلتي ويظهر على حقيقته وانا مش في دماغي أنا كل دماغي البنات الي اخدهم لقيته بعد أسبوع جاي عند اهلي الساعه 2 باليل ببيعيط ويقولي متزعليش مني انتي مش غلطانه أنا ممكن اكون انا كمان غلطت وهنعدي الازمه دي مع بعض وانا عارفك انتي متعمليش كده انا صدقته وروحت معاه بعد ما روحنا بدأ بقا يكلمني كلام كبير عليا دماغي مش مستوعباه اصلا يقولي الخيانه وكنتي بتعملي وكنتي بتقولي عالنت كذا وكذا اقوله يابني أنا كنت بتسلى أنا معرفش اعمل كده اصلا يقولي انتي مش هبله وفضلنا كده تقريبا شهر أخته كانت معانا في البيت الي قدامنا وطبعا بتسخنه عليا واقولها أنا مكنتش اعرف ياستي أن الموضوع كبير كده تقولي دي مصيبه دا كارثه وانا مش مقتنعه اصل انا محبتش حد ولا قابلت حد ولا حد شافني ولا شفت حد غلط اه بس معملتش جريمه أنا مشيت ورا واحده بتعمل كده عملت زيها المفروض أن ده واحد عاشرني 10 سنين ازاي يقول عليا كده بقيت اشوفه بشكل تاني أن ده واحد بيتمسكن لحد ما يتمكن دا كان عايز يمسكلي على نقطه ضعف عشان يفضل يذل فيا طول عمري ويقولي كفايه اني سامحتك أنا مكنتش فاهمه كده انا كنت مصدقه ومقتنعه أنه عمل فيا جميله أنه رجعتي للبيت وخلاني اشوف عيالي تاني وان المفروض ابوس أيده كل يوم أنه سامحني على الي أنا عاملته اقنعني اني مذنبه وعشت سنه اسود ايام عمري يصحيني من عز النوم يجرجرني من شعري ويقولي قومي امسحي قومي اعملي كنت انسانه متهانه بمعنى الكلمه واستكمل عشان بقول لنفسي انتي الي عملتي كده في نفسك تستاهلي وهو كتر خيره لحد مع الوقت بدأت استوعب الحياه والاقيه كل ما أعلمه الي على مزاجه حلو معايا وأول ما اطلب حق من حقوقي يفكرني بالي عملته بدأت اثور قدامه بعد سنه واطلب الطلاق لما يعرف اني واخدها جد يلم نفسه ويتعدل ويقولي اعذريني أنا غصب عني واشتغلت بعد الموضوع ده بسنتين قعدت سنه في الشغل وبعد كده بدأت ادي دروس من البيت هنا بدأت حياتي تمر قدامي بقا بدأت اشوف حياتي كامله يوم عن يوم بدأت اشوف حقيقيتي وحقيقه غيري لما اختلطت بالناس وبدأت أنصدم في الحياه عرفت افوق واشوف الصوره واضحه قدامي المهم بعد ما اشتغلت كلمني بقا عن المشاركه وأن احنا عايزين نحسن مستوانا ونجيب عربيه وزي ما حكيت بقيت اشتغل وأحط في البيت وتذاكر للعيال ولو فكرت ادي درس يبقى من فلوسي وحجته أن وراه اقساط العربيه وعندي قروض وطبعا أنا الزوجه الوفيه الي بتساعد

      فضلت كده 6 سنين بشتغل ومعملش لنفسي مليم بجيب للاولاد لبس واديهم دروس ونوادي واكل من بره وهو نادر اوي لو جاب فلوس وعمل حاجه لينا ابويا اتوفى واخدت فلوس الميراث بتاعي صرفتها برده على البيت والسفر والفسح هو بقا عمل ايه لما جاتلي الازمه دي المفروض الازمه دي هيبان وقفته بقا لا سابني وسافر مع أصحابه 3ايام وسابني لوحدي وانا ابويا كان عمري كله كنت بحكيله على كل أسراري كان الحضن الدافئ الي بتحمى فيه وهو عارف انا اتدمرت نفسيا بسبب ابويا وبسبب أن أنا مش لاقيه حد يسندني الي كان بيعملي كل حاجه في حياتي مشي وسابني لوحدي دلوقتي ليا مين ليا امي وأخواتي واولادي للاسف مسندنيش في ازمتي وكل مره يبقى ليه عذر واضطر أصدق عشان اعرف اعيش واربي العيال بقا بارد ولو نفسي في اي حاجه انا والاولاد لازم ندفع ولازم اصرف معتش في اهتمام ولا حب لاني فقت من الوهم الي كنت عايشه فيه بقيت واقعيه دلوقتي زي ما اخد زي ما ادي زي ما يدي زي ما ياخد أنا ماشيه على كده دلوقتي أنا بقالي 17 سنه متجوزه بس بردو أنا حاسه اني بموت بالبطئ لاني مش طبيعتي اني اعيش وخلاص أنا مش عارفه أمثل وهو بارد ومش واثقه فيه ومش عايزه حياتي تضيع خاصه اني بقالي كتير اوي يكافح عشان البيت ده يفضل مستمر بس بجد زهقت والعيال كبروا وفهموا وبداوا يشوفوا الي أنا بعمله والي هو بيعمله بحس اني عايشه في حرب

Viewing 0 reply threads
الرد: Amal
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن