• شاركي قصتك

    Eman تحديث قبل سنة، 7 أشهر 0 الأعضاء · 1 مشاركة
    • Eman

      مشارك
      9 أبريل، 2021 الساعة 2:08 م

      طموح

      بدأت حياتي باني فتحت عيني ما لاقيتش ابويا اتوفي وانا مكملتش سنة ومليش غير اخت الفرق بيني وبينها عشر سنين ومفيش بينا اي شبه في اي شئ هي طويلة وسمرا وانا قصيرة وبيضة وامي اللي قعدت تربينا رغم أن والدي مات وهي صغيرة عندها ٢٥سنةوجميلة وكتير حاولوا يتجوزها واولهم عمامي وهي رفضت وربنتنا الحمدلله تربية كويسة ومحرمتناش من اي حاجة تربية شبع زي ما بيقولوا وكانت حنينة الحمد لله بس فكرة أن مفيش اب ولا اخ خلتني عندي احتياج لفكرة السند مرت الايام وكبرت وكنت متفوقة في الدارسة جدا بفضل الله ولاني بحب اكون صح دايما اخدت الإعدادية واتفجأت بابن عمتي اللي عايش في القاهرة جاي يخطبني وكنت صغيرة اوي مش فاهمة أن الجواز مسؤولية كل اللي افتكرته اني هعيش في القاهرة ومستوي اعلي وعربيات ولبس ودهب وكان الاتفاق أنهم هيسبوني اخلص علي الاقل الثانوي فرحت اوي وشوفت في الاب والاخ والصديق والحبيب تربية مقفولة ومفتقدة لكل دة وبعد سنة من الخطوبة استعجلوا

      وطلعت إشاعة لتحديد سن الزواج وكتبنا الكتاب وانا عندي ١٥سنة وحتي مطلعتش بطاقة اضطرينا نلجأ للتسنين وهو تقرير طبي باني ينفع اتزوج وبعدها اتجوزت ودخلت وطبعا سبت الدارسة لاني من المنوفية ومعرفتش انقل كنت في أولي ثانوي وقعدت مع العيلة طول اليوم شغل واكل وباليل اروح شقتي انام فيها بس مكنتش بعمل مشاكل معاهم لكن مكنتش سعيدة مفيش خصوصية ولا حياة خاصة بيا وفضلت خمس سنين مخلفتش وهما كانوا قلقانين اوي وروحت لدكاترة كتير جدا وخدت أدوية كتير. وحملت في هاجر وكانت فرحتي لا توصف كنت خايفة مخلفش الحياة كانت ماشية اني مع العيلة في كل حاجة ميعرفش عني حاجة ولا احتياجتي ولا اي شئ حتي لو هروح لدكتور اخوه أو اخواته البنات يودوني وهو مشغول في الشغل وفي السفر

      وهاجركانت بنتي واختي وامي وكل حاجة حلوة في حياتي زرعت فيها كل اللي اتحرمت منه أولهم الثقة في النفس وأنها جميلة وليها بصمة وروحها حلوة

      وبعد هاجر بسنتين خلفت بيدو ابني واللي جده أصر اننا نسمي اسمه وحتي دي مخترتهاش ربنا قدر أن بيدو يطلع مش طبيعي ذكائه اقل من عمره تأخر دراسي واجتماعي واعتقد أن السبب الرئيسي هو زواج الاقارب بيني وبين ابوه وقررت ارجع للدراسة واخدت من اول أولي ثانوي منازل وكرهت روتين وملل الحياة وخدت الثانوية

      بس بعدها حملت في مروان ابني وكانت الحياة بدئت تتغير في مشاكل حصلت في الشغل واضطرينا نسيب بيتنا التمليك وناخد ايجار عشان هو مهدد وحتي قرار الايجار مكنش قراره انا اللي صممت لانه فضل فتره عند اخواته وانا بضطر اروح بالاولاد وتعبت نفسيا وبعت ارض ورث ليا من ابويا عشان تعسره المادي والدهب بتاعي اللي كان كتيرر وكنت بحبه اوي وبعدها ارض مباني وكل دة خده وضيعه وقعدت لحد ما مروان كبر ودخلت الجامعة المفتوحة عشان احقق حلم دخول الجامعة اللي مفرقنيش ودخلت علم نفس فئات خاصة عشان اهتم بأبني وبظروفه

      وكانت احلي حاجة عملتها في حياتي وفي سنة أولي اتعرفت علي صديقة وقالت إن الشغل عندها طالب ناس بمرتب بسيط لاكتساب خبرة فرحت وروحت عملت انترفيو واشتغلت وكان في اعتقادي اني معنديش اي موهبة ولا هعرف اشتغل وفوجئت بنفسي بمواهب كتير وبحب الناس والاولاد ذوي الاحتياجات اللي كانوا بيجروا عليا اول ما يشوفوني لاني فعلا بحبهم من جوايا وبضحك في وشهم ودة بيفرحهم وبدأت الأمور المادية في الانهيار معاه وأوقات كتير كان بيختفي ويسبنا عشان الملاحقات الأمنية ولولا المرتب الضعيف والشغل الخاص بتاعي وقتها معرفش كنت هعيش ازي واعمل في اولادي ايه في حاجات كان بيلح عليها اني اطلع الولاد من لغات لعربي وانا رفضت بشدة واصريت والحمد لله طلعت بنتي اللغة الإنجليزية عندها حلوة وبتجدها تماما واشتغلت في شركة فودافون UK

      بعد الثانوية

      كنا في اتجاه انا والاولاد وهو في اتجاه اخد مصنع ايجار وفضل ياخد فلوس من الناس ويمضي وصلات مع اني رافضة دة ومستحرمة وهو بيداري ويكدب واعرف من الناس ومسبش حد من العيلة ولا براها الا واخد منه وعملت مليون زعلة وروحت بيه دار الإفتاء من زعلي من تصرفاته ووقتها الشيخ قالي انتي مش عليكي ذنب هو المدان

      وحاولت كتير اغيره مفيش وهو مصمم لدرجة أن اخد فلوس من مدرسين في مدرسة بيدو اللي هو اصلا بيخاف والمدرس خوفه وكلمني يهددني وزعقت معاه

      وكل الناس اللي ليها فلوس بقت تجيلي البيت وتهددني ويطلبوا اني ابيع الشقة اللي جبتها من فلوس ورثي اللي اتبقت لانه قالهم أن الشقة ضمان للفلوس وأنه ليه نصها وكنت بروح الشغل والناس تجي تخبط علي الاولاد ويخافوا وهما لوحدهم خفت عليهم يضروا نفسيا وقررت اغزل واسيب الشقة واخاد ايجار وعزلت انا وبنتي لوحدنا في نص الليل من خوفنا من الناس والتهديد وهو مستخبي

      اتعرضنا لمواقف قاسية كتير. جدا عزلنا علي اكتر من مرة وباليل اوي ومكناش بنلاقي حد يشيل معنا ونشيل انا وهي

      بدأت أحس واشوف عيوبه هو فين من اللي عمله فينا ومش راضي يتغير. ومصر علي الغلط

      وطلبت الطلاق رفض وقالي مفيش الكلام دة عايزة تتطلقي ارفعي قضية مش هسيبك

      ورفعت خلع وخدت حكم وهو مكنش مصدق اني ممكن اعمل كدة وبيبرر لنفسه أن كل اللي حصل غصب عنه ووقفت لوحدى حتي اهلي كانوا رافضين وضل راجل ولا ضل حيطة والكلام الاهبل اللي بنسمعه والحمد ولادي شافوا معايا أن قراري صح وأننا تعبنا كتير المهم أنه مشي ودلوقتي انا وولادي مرتحين ومبسوطين وبيتنا بقي هادى ولا زعيق ولا مشاكل وكملت في تحمل مسؤوليتهم وفرحانة بيهم وكل شئ يهون وهما في حضني لاني كسبت نفسي وولادي وراحتي بجد

      وبقول لاي واحدة أن ساعة قوة التحمل بتكون غلط غيري اي وضع مش عاجبك انتي اقوي بايمانك بنفسك وبثقتك في ربنا ومتستنيش دعم من حد خليكي انتي اللي بتدعمي كل من حولك واهمهم ولادك اللي هما ثمرة حياتك وامتداد ليكي

Viewing 0 reply threads
الرد: Eman
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن