الرئيسية المنتديات شاركي قصتك زى زيك بس انا بحب نفسي

  • شاركي قصتك

    Koky Kamal تحديث قبل سنة، 8 أشهر 1 الأعضاء · 1 مشاركة
    • Koky Kamal

      مشارك
      26 مارس، 2021 الساعة 5:56 م

      ممكن تكون حكايتى عاديه بالنسبه لناس كتير عشان مش هما اللي عاشو تفاصيلها بس انا شايفه انى عملت انجاز ولسه بعمل وهعمل إنجازات اكتر واكبر

      الحكايه بدأت من زمان مش فاكره امتا بالظبط بس فاكره الطفله اللى مكنتش متشافه من أهلها ولا ليها رأى بس كان ليها دور ماهى كانت بنت والبنت دورها ايه تخدم أخواتها الرجاله مش الولاد هما اتولدو رجاله وتساعد امها ومينفعش تقول لا ولا تشتكى ولو اضربت عادي هيطلع ٢٤ ضلع بس محدش كان واخد باله ان اللى مش هناخده جوه البيت هندور عليه بره وكبرت البنت….

      انا كريمان دلوقتى بقا عندى ١٨ سنه بدرس ثانوى عام وبشتغل بردو وبصرف على دروسي عشان انا اللى عايزه اكمل تعليمى اتعرفت على شاب اكبر منى ب٩ سنين شكله كويس وابن ناس وكمان معاه عربيه مشغلها ومستواه كويس ومهتم بيا وبيقولى انه بيحبنى وعايز يتجوزنى بيجيلى الحاجه اللى بحبها واما يكون عندي مشكله هو أول واحد جنبي انا كمان حبيته واتعودت على وجوده دلوقتى بقالنا سنه مع بعض وجاى يخطبنى

      قابل بابا بس هو رفض شافه مش مناسب بس انا موافقه تعبت من بيت أهلى وعايزه اخرج منه وبعد محاولات الإقناع اخيرا بابا وافق واتخطبنا ونزلنا صورنا ع فيس بوك وكل الناس باركت وعدت سنتين واتجوزنا ?‍♀️نسيت اقول فى الخطوبه انا جيت ع نفسي كتير واستحملت ع اساس هيتغير بعد الجواز مكناش متفاهمين وكان كل كلامه بيمشي عليا وبنتخانق كتير..

      بعد الجواز بقيت بضرب وانا حامل واتمنعت من انى اكمل دراستي وكنت بتحبس فى البيت ويتقفل عليا وساعات يحلف منامش فى بيتى واتخانت كذا مره واتهانت واتذليت وكل ده ع اسباب تافهه مكنش ينفع اشتكى وكمان هرجع للنار تانى طب ماهنا وهنا نار استمريت ٤ سنين بعانى حرفيا كل يوم وبقول لنفسي معقول هى دى حياتك وهو ده اخرك الست الضعيفه المكسوره طب هتبصي فى وش ولادك ازاى طب بنتك هتعيش نفس حياتك ما انا في الوقت ده معايا ولد وبنت وفى يوم اتخانقنا بس مكنتش زى كل الخناقات اتا موت من الضرب وحصل مشاكل فى ضهرى اتعالجت فى شهور وبعد يومين بدعى ربنا وبفكر قررت انى همشي من الحياه دى وأنى مستحقش اللى حصلى وانى استاهل اعيش حياه حاسه فيها بالأمان وسبته ومشيت من غير فلوس ولا عيالى ولا هدومى بس خدت اشلاء نفسي روحت عند أهلى وبلغتهم انى قررت الانفصال وأنى مش هقبل اى معامله سيئه من اى حد وأنى مش هسمح لحد يضربنى او يهينى وأنى قاعده عندهم ضيفه لحد ماقدر اجيب بيت اعيش فى انا وولادى اللى هسترجعهم بالقانون من ابوهم

      انا كريمان الان عندى ٢٧ سنه منفصله بقالى سنه اكتشفت انى كنت متزوجه من نرجسي تعافيت وبقيت احسن لقيت شغل فى حضانه إنترناشيونال شغاله شيف وقدمت فى الجامعه المفتوحه واشتريت شقه صغيره على أدى انا ولادى وبجهزها حاليا عشان انقل فيها وكمان ولادى معايا مازن طفل رياضي بيلعب كونغ فو وشاطر فى ألحضانه بقا عندى هدوم جديده وأصحاب جداد وحياه جديده بقيت بعرف اضحك وافرح وضحكتى بقت حقيقه مش مزيفه بقا عندى امل وتفائل فى الحياه

      اتعلمت ان مهما كان الأمل ضعيف والأبواب مغلقه قاوم لآخر نفس الموت وانت بتحاول ارحم من الاستسلام

Viewing 0 reply threads
الرد: Koky Kamal
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن