شاركي قصتك
تحديث قبل 3 سنوات، شهر 1 الأعضاء · 1
مشاركة 
انا واحدة عندي اصابة في ركبتي لكن كان عندي حلم اني اطلع رحلة 1000 كيلو بالعجل من القاهرة لشلاتين. قعدت سنين بحلم الحلم ده وفي الاول مكنش معايا فلوس كفاية تخليني اجيب عجلة ولا اني اطلع الرحلة مع المنظمين اللي كنت نفسي اطلع معاهم ومكنش عندي لياقة كافية كمان. كنت في الفترة دي بمر بحالة اكتئاب وبتعالج نفسيا نتيجة لاني تعرضت لاذية كتير في حياتي وفي النص كنت بحاول اخلص الMBA بتاعتي .. شغلي مكنش احسن حاجة كنت بشتغل في مكان بيقتلني حرفيا ومكنتش عارفة اسيبه لاني كنت بديت اتوجه ناحية الحاجة اللي بحبها الmarketing وانا عندي 29 سنة فبالتالي انا كنت بالنسبة لاي شركة مذاكرة حلو لكن كنت بترفض عشان سني كنت ساعتها 32 وعشان بالنسبة للسوق اول منصب تسويقي مسكته كان الشغل في المكان الوحش اللي كنت بحاول بايدي وسناني امشي منه كان كله عايز يديني مرتبات ميخدهاش حد لسة متخرج جديد او شايف انه لا انتي عندك العلم لكن ما اشتغلتيش سنين كتير بايدك في المجال ده
. في لحظة ما قررت اسيب الشغل واركز في مذاكرتي بس ورغم ان اهلي اتخانقوا معايا بسبب القرار ده الا اني اصريت بشدة. بعدها بديت ادور على شغل وبعد تعب واول ما قررت اني خلال الفترة دي هذاكر حاجات تانية جنب الMBA ربنا كرمني بعد 5 شهور في البيت واتعينت في مكان محترم بمرتب استحقه بالفعل.. بعدها بسنة خلصت الMBA و ساعتها بديت اشتغل على لياقتي شوية و ركبتي اتحسنت شوية بعدين قررت افتكر اركب عجل ازاي .. اتمرنت عجل واشتريت عجلتي وقابلت ناس ساعدتني ووقفت جنبي لما شرحت لهم حلمي وبالفعل بعدها بشهرين طلعت الرحلة وكان احلى انجاز عملته في حياتي اني سافرت مصر بالعجلة واتحديت نفسي وقطعت ال 1000 كيلو واثبت لنفسي ان حتى بركبتي دي انا اقدر اعمل اللي نفسي فيه ومفيش حاجة هتوقفني. دلوقتي بتمرن ترياثلون كان عندي مشكلة في الجري لان عندي ربو …حاليا بعد تمرين 3 شهور مع الفريق اللي انا فيه تحولت من حد مش بيجري خالص لشخص ممكن يجري 5 و7 كيلو لسة قدامي سكة في الجري انا عارفة لكن مع كل شهر بيعدي ومع كل لحظة بشك فيها بفضل اقول لنفسي هتقدري وهتوصلي. مكلمة في العجل وكل شهر ارقامي بتتحسن عن الاول ولسة هتمرن سباحة واكمل شغل عليها.. بحلم اني اكون بطلة وادخل ironman اتمنى الحق اعمل ده قبل ال 40 لكن حتى لو محصلش انا هفضل مكملة تمرين لحد ما ده يحصل.
Viewing 0 reply threads