الرئيسية المنتديات شاركي قصتك خسيت ٤٠ كيلو مع الفيبروميلاجيا

  • شاركي قصتك

    Mayar تحديث قبل سنة، 8 أشهر 1 الأعضاء · 1 مشاركة
    • Mayar

      مشارك
      20 مارس، 2021 الساعة 1:53 ص

      انتي بقيتي فاشله و بتنامي كتير و تخنتي جدا ازاي سايبه نفسك كده ؟

      من و انا صغيره و انا تخينه و بسمع جملة انتي تخينه و مينفعش منظرك دا و دي كانت من اكبر مشاكلي.

      لحد من سنتين لما بقيت نايمه على طول مش عايزه اعمل حاجه ، تعب في كتفي و جسمي غريب ، حاجات مش طبيعيه بتحصل.

      سمعت من دكتور اسم غير حياتي كلها “فيبروميالجيا” و من اليوم دا و انا بقيت عارفه سبب كل حاجه. وجع في جسمي كله ، مش عارفه اتحرك، دوخه ،مشاكل في الرؤيه ، قولون عصبي ، صداع نصفي ،جسمي بيوقف ، نزيف في البيريود ، ضربات قلب زياده ، ضغط واطي ، نفس بيروح ، وجع في الرجل و الضهر و الرقبه و الكتف.

      طبعا روحت لدكاتره كتير في اللي قال انه دا في دماغي ، و اللي قال اني عايزه مخدرات ، و في اللي قال انو دي موضه. بس الحمدلله ربنا كرمني بالداكتره و الناس اللي شخصتني و فهمتني ايه اللي عندي.

      مرض مزمن ملهوش علاج بيسبب حاجات كتير زي اللي قولتها فوق و اكتر و بيجي هجمات تخلي الوجع يزيد. أدوية اعصاب ، منوم ، مسكنات اللي حصل هو اني تخنت اكتر ما تخينه تخينه و سقت كل المواد السنه دي في الجامعه.

      في الوقت دا كان قدامي طريقين استسلم للي بيحصل و حياتي تضيع او اواجه.

      في خلال سنه نجحت المواد اللي سقتها ، و نجحت كل المواد اللي في الجامعة السنه اللي بعدها و في اخر سنه دلوقتي. خسيت اربعين كيلو و لسه مكله لحد ما هوصل للهدف بتاعي . بقيت بشتغل اونلاين في اكتر من حاجه، بدأت قرأة و رياضه.

      ايوه انا لسه بتعب و المرض دا مكمل معيا بس انا خليتوا يغير حياتي للاحسن عملت اللي كان مستحيل اعمله. عرفت اخس مع الادويه ، و انجح مع التعب و الوجع علشان عندي هدف. ناس كتير قالتلي مستحيل بس مفيش حاجه مستحيله.

      انا عايزه اقول انو الفيبروميالجيا مش مرض مميت بس معاك طول حياتك. و ببقى تعبانه كل يوم و ساعة بحس اني عايزه استسلم و مش قادره اكمل ، و دا بيزيد لما بتحصل حاجه جديده مش عاره ايه هي او هجمه. بس بفكر نفسي على طول اني اقوى من اي حاجه و انا اللي هتحكم في مش هو اللي هيتحكم فيا. انا نفسي بس الناس تفهم ايه دا و تعرف انه بجد و مش وهم و فعلا بنحتاج دعم اللي حوالينا.

Viewing 0 reply threads
الرد: Mayar
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن