الرئيسية المنتديات شاركي قصتك حياتي مع نرجسي

  • شاركي قصتك

    Amany تحديث قبل سنة، 8 أشهر 1 الأعضاء · 1 مشاركة
    • Amany

      مشارك
      18 مارس، 2021 الساعة 11:38 ص

      اتجوزت من ٢٣ سنه كنت طالبه في كليه تربيه فنيه من زوج يشغل منصب في (كلمة محذوفة) كنت مليانه طاقه و حيويه برسم بقرا بحب الموسيقى و الرياضه من اول يوم جواز منعني من كل حاجه اصحاب اهل هوايات صراع طويل لتحويلي لمسخ كل دوري حسب ما يحب هو طبخ و تنضيف و إنجاب أولاد مش مسموح ليا باكتر من كدا و كمان تعنيف بكل الطرق نفسيا و جسديا لحد ما عرفت انه نرجسي سيكوباتي يعشق التعذيب النفسي و الجسدي ليه علاقات مقرفه و لظروف شغله كنت بسافر معاه كل مكان و طبعا ممنوع اشتغل ممنوع ارسم ممنوع يكون ليا صحاب ١٩ سنه مانعني من الشغل برغم اني اتعينت مدرسه تربيه فنيه-بفضل تدخل حمايا و حماتي رحمه الله عليهم- بس مش عارفه اشتغل لاننا كل سنه في محافظه مختلفه سحب مني كل ميراثي بالحيله بالعافيه بالضغط و نصب عليا كمان باعلي عقارات وهميه مش موجوده

      خلال آخر سنين معاه فكرت اعمل دراسات عليا و دخلت اهله يتوسطو ليا اكمل بعد ما فرض شروطه ما حسستوش اني بدرس ولا بنجح تخيلو بذاكر و اعمل دراسات و اقرا و اعمل أبحاث في السر كان مفكر ان اخري اخد شهادات و ارميها في الدرج لحد من ٥ سنين اخيرا أظهر وش الشيطان قدام اهلي اللي ماكانش حد فيهم مصدق كلامي انه مضطرب نفسيا و انه خطر على حياتي و حياه ولادي لأنه قدام الناس مثال الشخص التقي صلاه في المسجد حافظ كتاب الله افعاله قدام الناس مثال التقي النقي قرر مع نفسه بعد ما سحب مني كل حاجه فلوس و عمري و ولادي الكبار انه يرميني انا و و ولادي الصغار و يشطبنا من حياته عقابا ليا ان الماسك اللي كان عامله قدام الناس وقع و بدأ معانا مرحله من الإجرام و التهديد منع الاولاد من التعليم نزلت الشغل من ٣ سنين بمرتب ضعيف لاني مدرسه و كملت ورقي الناقص في شغلي

      بالمناسبه انا عملت الدراسات العليا في التربيه الخاصه و بقيت أخصائي تنميه مهارات و علاج وظيفي و تعديل سلوك بالفنون التشكيليه لذوي الاحتياجات الخاصة و دي احلى فرحه في حياتي لما اشتغلت مع الملايكه و اشوف شغلهم و فرحتهم و فرحة اهاليهم أه لسه مش عارفه اسوي اموري الماديه ولا الم ولادي معايا في بيت واحد -واخد الاتنين الكبار – و انا معايا الاتنين الصغار ربنا يقدرني و اربيهم و اعلمهم و الم شمل ولادي في حضني اللي بقالي ٤ سنين ما اتلميناش مع بعض ولا عارفه اتطلق و لسه ماخدتش حقوقي اللي نصب عليا فيها بسبب تلاعبه في المحاكم بس واثقه في ربنا و مكمله اللي عليا لحد ما ربنا يأذن بالفرج و الم شمل ولادي و ادخل الولدين الكبار جامعه لأنه حرمهم من دخول كليات ان شاء الله خير

      دي صور شغل حبايبي ذوي الهمم احلى حاجه افرحكم بيها بعد القصه النكد دي ??

      • هذا الموضوع تم تعديله في قبل سنة، 8 أشهر بواسطة mohamed El-abacy.
Viewing 0 reply threads
الرد: Amany
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن