الرئيسية المنتديات شاركي قصتك تقع وتقوم .. وتقوم وتقع

  • شاركي قصتك

    Nermeen تحديث قبل سنة، 8 أشهر 1 الأعضاء · 1 مشاركة
    • Nermeen

      مشارك
      22 مارس، 2021 الساعة 8:35 م

      قصتي تعتبر سلسلة من النجاحات اللي تخللها لحظات الم وسقوط اللي لو كنت استسلمت لها كنت خسرت كتير جدا عشان كده حابة اشاركها لعلها تكون حافز لغيري أنهم يعافروا

      خلينا نبدا من صدمة ثانوية عامة واني جبت ٩٥% واللي ماكانوش كفاية اني ادخل الكلية اللي كان نفسي فيها وكانت أول وقعة

      بس ماستسلمتش وقدمت في منحة اسمها لوتس وقدرت اني ادرس في الأكاديمية البحرية في كلية الإدارة والتكنولوجيا قسم اداره الاعلام ده غير الكورسات الكتير اللي اخدتها في الانجليزي من الجامعة البريطانية والجامعة الأمريكية وكورسات تانية في مهارات زي إدارة الوقت والقيادة والعمل الجماعي وغيرها كتير وكل ده اهلني أن أسافر وادرس في امريكا لمدة ترم وكل ده من غير ما ادفع جنيه واحد

      اتخرجت بتقدير امتياز مع مرتبة الشرف وكنت التانية على الدفعة وانا اللي ألقيت كلمة الطلبة في حفلة التخرج وجت تاني وقعة بعد السفر والتعب والشهادات دي كلها مفيش شغل في مجالي وماحاولتش اتغرب تاني وادور على شغل في القاهره وقتها كنت اتخطبت وفكرة اني اتغرب تاني شبه كانت صعبة علي اهلي

      اشتغلت في كل حاجة واي حاجة عشان أشيل مسؤلية نفسي لدرجة اني اشتغلت 3شغلانات في نفس الوقت وكنت بنام 4ساعات في اليوم عشان اثبت لنفسي اني اقدر اعمل اي حاجه ومع ذلك سمعت من ناس أقل مني دراسيا كلمة معلش يعني بس انتي دراستك عملتلك ايه يعني اديكي مش لاقيه شغل

      بعدها جاتلي فرصة عمل كانت بالنسبالي ذهبية في ميناء شرق بورسعيد وفعلا قدمت واتقبلت وكانت فترة ممتعة جدا في حياتي رغم تعبها لكن اثبت نفسي هناك

      وهنا جت الوقعة التالتة وهي اني اتجوزت وبسرعة جدا عرفت أن احلي حاجة ممكن تحصلي هي اكتر حاجة بقت تقصر على شغلي انا هكون مامي ? بس ده كان صعب جدا وانا بركب كل يوم 3 باصات ومعدية رايح و زيهم في الرجعة ده غير المشي الكتير عشان معديش علي أجهزة الاكس راي عشان ماضرش البيبي ضغطي كان بيوطي جدا بسبب الشمس والحر وكان لازم اختار اما الشغل اللي بحبه أو بنتي

      وانا اختارت بنتي وسيبت اكتر شغل حبيته

      وعشان مقعدش في البيت واكتئب نزلت شغل في مدرسة انترناشونال وكانت فترة جميلة جدا في حياتي لحد ما جه وقت اني أقابل اكتر انسانه حبيتها بنوتي دانيلا

      بس مع الاسف وقعت كمان وقعة وهي أن خلاص انا حياتي انتهت مين هيقبل ام للشغل ازاي اكمل دراستي وامتي هحقق احلام كتيره كنت بحلمها

      وهنا ظهر دور دعم جوزي واهلي اشتغلت كسيلر اونلاين عشان احس اني بعمل حاجة لحد ما بنوتي كبرت و بقيت اقدر اسيبها مع والدتي وقدمت في شركة ملاحة هي ال6 علي العالم واللي كنت متأكدة أنهم هيرفضوني من اول انترفيو لاني صارحتهم باني ام وبنتي يادوب هتكمل ال 6 شهور

      بس بفضل ربنا عديت كل الانترفيوز والامتحانات اللي اتعملتلي والنهاردة كل اللي بيقابلوني من اللي عمل لي الانترفيوز قالولي احنا كنا متأكدين انك هتقدري

      وقدرت .. قدرت اخد دبلومة في الملاحة وقدرت اني اثبت نفسي في شغلي وقدرت اني احافظ على بيتي وبنتي بدعم اهلي طبعا وكل ده في 7شهور بس

      انا فخورة بمشاورى وبنفسي واتمني ان كل واحدة تكون عارفه انها تقدر تعمل المستحيل بس محتاجة أنها ماتسمعش للناس السلبية وتحاوط نفسها بالدعم المناسب وأنها كل ما تقع تقوم ??

      اه نسيت اقولكم انا نرمين مجدي وعندي 26 سنة بس

Viewing 0 reply threads
الرد: Nermeen
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن