شاركي قصتك
تحديث قبل 3 سنوات، شهر 1 الأعضاء · 1
مشاركة 
حكايتى بدات من زماااان من وانا لسه بنت ف بيت بابا كنت طفله مدلله جدا كل طلباتها اوامر مع اننا كنا سبع اخوات بس انا كنت الوسطانيه وجايه بعد ٨سنين مكنتش بعرف اعمل اى حاجه لوحدى حرفيا طلعت لقيت ماما عندها شغاله وبابا ميسور جدا بيجيبلنا كل حاجه مكانش بس مسموحلنا الاختلاط باقرانا كان قافل علينا جدا روحت مدرسه السانت فامى بنات بس طلعت ع ثانوى بنات بس كل الدروس ف البيت ولوحدى بابا بيوصلنا المدرسه ويجيبنا مبنعرفش بنتعامل مع الناس لدرجه اى حد كان يقولى اى كلمه بعيط ومش بعرف ارد …
المهم سمونى بكيزه هانم من كتر ماانا طلباتى اوامر ودايما مش عاجبنى حاجه وطالعه فيها بس كنت شاطره ف دراستى ..دخلت ثانوى واشتركت ف مجال الغنا والمسرح وكانت المدرسه اللى ماسكه المسرح بنت صديق لابويا واول مادخلت تانيه ثانوى جابت اخوها المدرسه كان ضابط ف الاكاديميه البحريه ع اساس صدفه يعنى انه يشوفنى وعجبته وجه اتقدملى كنت ف تانيه ثانوى وبابا وافق طبعا وماما ..انا مكنتش موافقه خالص بس طبعا بابا اجبرنى ووافقت لان مكانش لينا راى ف الحاجات دى ..
اتخطبت وكان اول راجل ف حياتى كان كويس ف الاول واتخطبنااربع سنين مكناش بنشوف بعض فيهم غير كل يوم جمعه لو هو مش مسافر بالشهور يعنى مثلا الشهر اللى موجود فيه بنشوف فيه بعض كل جمعه مع وجود الاهل طبعا ف المقابله..
بعد الاربع سنين خطوبه اتكتب كتابنا واتجوزت وانا ف تالته جامعه ودخلت كليه تربيه قسم رياض اطفال بنات بسسسسس …بداءت مرحله جديده ف حياتى وهى ان فى حد واقف فوق دماغي طول الوقت ناططلى ف الكليه بيسال عليا جوه المحاضرات غيره غيره غيره وصلت لدرجه الشك وللاسف كملت عادى لانى مكانش ليا تجارب ولا حد فهمنى حاجه واتجوزنا وبداء يمد ايده عليا لابسط الاسباب ف البيت بقي ف الشارع ف بيتهم وكنت بسيب البيت كتير وادخل اهلى ويرجعونى تانى لما حد يتدخل للصلح ..
كان بيعرف يضحك عليا بكلام حلو ف التليفون وارجعله زى العبيطه حملت وانا ف رابعه جامعه وولدت يوم نتيجتى ونجحت وجبت تقدير مع انى كنت طول الوقت ف مشاكل بس قدرت الحمد لله
لما اتجوزت اتعلمت حاجات كتير لوحدى الطبيخ التنضيف تحمل المسؤليه بدأت افقد بكيزه شويه بس مش كتير
اتضربت واتهانت كتييير ف وسط ده كله كان البيه بطل شغل خالص وقعد جنبي بعت دهبي وحاجات من شقتى ووقفت جنبه مع انه ميستاهلش
كان بياخد الدهب او الفلوس ويروح ياجر بيها عربيات يتفسح بيها مع صحابه وحابسنى انا حتى البلكونه ممنوع كان بيقفل عليا وهو خارج
كرهت حياتى وتخيلت بنتى بتكبر وسط القرف ده قررت انى هسيبه واطلق غصب عن اى حد يااما هقتله بقي معنديش حل تانى ..
ف مره من مرات الضرب روحت المستشفى لانى مكنتش شايفه بعينى من كتر الضرب ومن يومها وانا خدت القرار
خليته نايم ف يوم ولميت حاجتى وحاجه بنتى ف شنطه وقفلت تليفونه واخدت المفتاح وخرجت وقفلت عليه من بره ..وطبعا مروحتش بيتنا عند بابا..
روحت عند الشغاله بتاعتنا اللى بقالها معانا ٢٠سنه وخبيت عن الكل انا فين لحد ماوصت للى انا عايزاه واتطلقت بس بشرط انه ياخد البنت واخدها فعلا وكنت بموت لحد مارجعوهالى تانى واتجوزت تانى بعدها بسنه واحد اكبر منى ب٢٠سنه للاسف عشان بس اخرج من بيت بابا اللى كان حابسنى اكتر م الاول وحملت تانى وخلفت ادهم وبردو بس المره دى كنت انا الشغاله بخدم امه وشايله مسؤليه كل حاااااجه كان بنى ادم بخيل ف كل حاجه حتى المشاعر كان مالوش علاقه بالنضافه الشخصيه ٨سنين متحملتش اكتر من كده واتطلقت تانى بس بعد صعوبه شديده جدا فضلت منفصله سنتين من غير طلاق عند بابا اخد كل حاجتى اللى بالمناسبه بابا اللى كان جايبها كلها ولا هو ولا الاولانى كانوا يعرفوا حاجه عن ولادهم ولا مصاريف ولا سؤال لحد مابابا اتوفى واتطلقت مقابل انى اتنازله عن قضيه النفقه اللى كسبتها عشان اصرف ع ابنه ووافقت طبعا ..بعد كده وبدون دخول ف تفاصيل كتييير اتجوزت واحد من سنى ظابط جيش محترم وبيعاملنى بما يرضي الله بيعامل ولادى كويس جدا ومبسوطه معاه وبحبه زحاسه ان ربنا عوضنى بيه خير ومازال ولادى معايا وانا اللى متحمله مسؤليتهم ف كل حاجه لان ابهاتهم زى عدمهم رغم انى بقابل مشاكل كتير نفسيه بيتعرضوا ليها الولاد بس بحاول دايما ابقي قويه … الاهم من ده كله ان انا اشتغلت وحققت نفسى جدا وبقيت مدرسه شاطره جدا ف مجالى ومحبوبه وصرفت ع ولادى لحد مابقوا ف ثانوى واتعلمت السواقه واشتريت عربيه ..وبقت من هواياتى الطبخ والحلويات وعملت بيدج ع الفيسبوك وعملت اوردرات كتير ونجحت اوى ف كل حاجه كنت بدخلها واتعلمت حاجات كتيييير جدا اهمها ان الدنيا مبتقفش ع حد وان اللى عايز ينجح بينجح وان المسؤليه مش اى حد بيقدر يبقي ادها بس انا فخوره بنفسي انى كنت بكيزه وبقيت زغلول بس احلى زغلول..
Viewing 0 reply threads