الرئيسية المنتديات شاركي قصتك بقيت ماما سمر

  • شاركي قصتك

    Samr تحديث قبل سنة، 8 أشهر 1 الأعضاء · 1 مشاركة
    • Samr

      مشارك
      21 مارس، 2021 الساعة 7:11 م

      انا طفلة كنت ومازلت وأعني كلماتي حرفيا كنت طفلة مدلله محرومة الظاهر اني مرفهه عن القيام بكثير من المهام الحياتية والمنزلية الحقيقة اني اتحرمت ….ايوة اتحرمت اعيش حياة البنات اتحرمت اخرج طول الوقت ماما سيباني قدام التليفزيون حفظت الافلام الابيض واسود وابطالها هما معارفي واصحابي ماعرفش الناس في الشارع شكلهم ايه افتكرت ان كل الرجال بخفة دم اسماعيل يس وفؤاد المهندس وبشياكة رشدي أباظه وأحمد مظهر واني لازم اتكلم بطريقة فاتن حمامة في نهر الحب وان العالم بره باب البيت يشبة سينما زمان ولما خرجت ياما قابلت اتعرفت واتلخبطت واتصدمت حبيت واتحبيت سيبت واتسابت توهان ومفيش هدف لاني اصلا ماكنتش بعرف احط هدف كنت بطلب وطلباتي مجابه المهم ابطل اسئله وافضل جوه البيت عشان عيب ماما تبقي بره ومعاها طفله ممكن تحرجها او تضايقها

      اتحرمت من اني اعرف نفسي صح والاخر شكله ايه وصفاته كمان ايه ازاي اتعامل ازاي ابني علاقات سليمة وصحية كل علاقاتي كانت مشوهه وغير واضحة

      اتحرمت اخد قرار في جوازي لان اهلي هما اللي بيختاروا الاصلح ويوم ما قلت بحب قالولي سيبنا ايدنا وانتي شيلي اختيارك مالناش دعوه بيكي ارتبكت واتراجعت واتجوزت علي هواهم وهووووب خلفت

      يا نهار مش فايت هو انا لحقت عشت …ماحصلش

      وكالعادة ارتبكت ,,,بس زيزو له مفعول السحر ووجود ربنا جنبي خلاني غيرررررررر

      كان دايما جوايا احساس ان الطريق الصح موجود بس انا عيني مش شيفاه وهناك شيء ما يحدث والامل مش بيموت …. بس مش هقول أد ايه الصراع جوايا ماكانش بينيمني ليالي انا عايزة ايه عايزة اكون ايه وياتري انا في المكان الصح مع الراجل الصح

      وبعمل ايه في حياتي ورايحه علي فين هفضل تايهه كده كتير ولا هلاقي الطريق هو اصلا المفروض امشي منين

      اعلان ع الفيس عن دبلومة لذوي الاحتياجات الخاصة

      قدمت ونجحت بامتياز

      ايه ده انا بنجح وبامتياز كمان غالبا انا شاطره في حاجه مهما كانت لسه مش واضحه وبسيطه بس شاطره اهه بعرف اذاكر وبعرف اهتم وبعرف احط هدف وبعرف اوصل بفضل ربنا طبعا

      قررت احدد الهدف اكتر واقرب المسافات درست دبلومة تانية عن صعوبات التعلم في نفس الوقت اللي ظهر امامي منهج منتسوري لتعليم الاطفال

      الموضوع ملفت ومهم بعد بحث ودراسة واهتمام نجحت تاني بامتياز

      لقيت الفكرة بتقرب وزيزو ابني كان حافز قوي اني افهمه واعرف عنه بما اني في الاساس مش عارفه نفسي ماينفعش اظلمه معايا ووانا بتعلم عنه اكتشفت اني بعرف نفسي وبدأت افهم اساس المشكله فين واكتشفت ان الطفله اللي جوايا مالقتش شخص بالغ يرشدها للطريق فقررت امشي مع ابني الطريق واعلمه بمنهج منتسوري واتعلم معاه ونكبر سوا

      هو اكتر حد مهم في حياتي عاش معايا رحلة اكتشاف نفسي اللي ماخليتش من بعض التخبط والوقوع في بير التشتت

      انهارده انا معلمة منزلية لابني وبساعد الامهات انها تعرف منهج منتسوري بشكل افضل عشان تساعد ولادها وتعلمهم أحسن من خلال كورسات اونلاين وورش عمل

      انهارده انا مامت زيزو …ماما سمر …..اللي بتكبر مع زيزو يوم بيوم ?

Viewing 0 reply threads
الرد: Samr
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن