شاركي قصتك
تحديث قبل سنتين، 5 أشهر 1 الأعضاء · 1
مشاركة 
بعتبر نفسي من أكتر الناس اللي إتسحلت ف حياتها ع تقدر تحقق اللى وصلتله لحد دلوقتي
وده جزء من أحلامي بيتحقق قدام عينيا
كنت أم ل٣ بنات عمرهم أقل من ٣ سنين
منهم ٢ توأم والتالته أصغر منهم
كان جوايا طاقه كبيره جدا إني أحقق ذاتي
مكنتش عوزه أبقي مجرد ست بيت وأم عادية بتربي العيال
-أنا نيڤين كامل
-٣١سنه
– *مصممة أزياء وفنانه تشكيلية برسم عالملابس والأحذية وأي حاجه بتقع تحت إيدى بحب أرسم عليها ❤
*صاحبة براند nk fashion designs للأزياء
*صاحبة براند ألوان القماش novofabriccolor
*وصاحبة #مبادرة_شقلبي_دولابك
-إتخرجت من كلية تجارة
دراستي ملهاش أي علاقة بمجال شغلي
هوايتي من صغري كانت الرسم وإللي حولتها بعد التخرج لشغل وحبيت أتخصص أكتر في الرسم علي الملابس لأن كان ليا تجارب شخصيه ناجحه ف الرسم علي ملابسي وملابس المحيطين بيا وحبيت الموضوع اوى ?
-علمت نفسي بنفسي كل حاجه ف المجال ده
-ف ٢٠١١عملت بيدج عالفيسبوك وعرضت صور لأعمالي والحمد لله كان في توفيق من عند ربنا وإعجاب من الناس
لأعمالي رغم غرابة الفكرة وقتها
كانت جديده وكان قليلين اللي بيرسموا عالقماش وقتها مش زى دلوقتي
-شويه شويه بدأ يتواصل معايا معدين برامج وصحفيين عن طريق السوشيال ميديا ع يظهروا موهبتي عالتليفزيون ويكتبوا عني ومن هنا بدأت شهرتي الفعليه
-من زمان وانا ليا دماغ وذوق خاص ف الأزياء بحب كل ما هو شيك وعصري وغريب او غير مألوف
-لما لقيت فرصه حبيت اطور من نفسي وأصمم الأزياء اللي برسم عليها بدل ما كنت بس برسم علي تيشيرت او شوز بيزيك ساده ..خدت خطوات لده وعملت كزا كولكشن أزياء ونجحت ف ده الحمد لله.
– ف الحقيقة قابلتني عوائق كتير ف حياتي طبعا
*وكان أولها وأهمها إن أنا أم ل ٣ بنات صغيرين معتمدين عليا إعتماد كلي
كنت وقفت شغل ٣ سنين لأن
الطبيعي إن مكانش في وقت لأي حاجه تانيه غير محاولة تربيتهم
إللي مش طبيعي إن أنا كان في فران ف دماغي ليل ونهار ..ديزاين رايح وديزاين جاي..وهموووت وأرسم وأرجع أشتغل بس مكانش في وقت ..كنت بستني فرصه ان ال ٣ بنات يناموا وكنت باخد من وقت نومي وأقوم أرسم أى حاجه من الأفكار اللي عندى
*تاني عائق إن أنا بعد ما خلفت كان جوزى رافض شغلي بحجة البيت والأطفال ..فضلت أرسمله علي كل حاجه هدومناو
الحيطان والجزم والكوبيات ..أى أى حاجه ف البيت ??
ع أثبتله إن أنا هلاقي وقت وهقدر أوفق بين شغلي وحياتي
لحد ما أخيرا وافق ورجعت أشتغل
*تالت عائق كان إني ألاقي نوع ألوان مناسب للقماش يكون جودته عاليه مع تجاربي الكتيره وخبرتي الطويله ف الالوان والبحث الكتير قدرت أتوصل إني أعمل تركيبة ألوان أشتغل بيها ولقيت ناس بتبعتلي وتسألني عليها
فقررت إن الألوان تبقي مشروعي التاني وأطلقت براند ألوان خاص بيا إسمه novo fabric color وبتتباع لأي حد ..والطريف ف الموضوع إن أنا في بداياتي أثناء البحث عن نوع ألوان مناسب كنت سألت واحده بتشتغل في نفس المجال عن نوع الألوان إللي بتستخدمه إيه ؟؟ ردت عليا بضحكة صفرا وقالتلي سر المهنه ?
لفت الأيام ودارت وجت هي نفسها وبقت بتشترى من ألواني ومبتستخدمش غيرها دلوقتي ??
-كان عندى ثقة عالية ف نفسي وف إن ربنا هو اللي بيقسم الأرزاق وإن أنا لما أعلم غيري هاخد أجر وثواب تعليمهم وكان عندى يقين إن كل فنان ليه طابع وروح خاصه بيتميز بيها واللي عاوز يتعلم هيتعلم سواء أنا وافقت أعلمه أو قفلت الباب في وشه وقلتله “سر المهنه !” زى ما إتقالي زمان .. برضو هيتعلم
ومن هنا جت فكرة #مبادرة_شقلبي_دولابك واللي بتقوم فكرتها علي تعليم الرسم علي الملابس وإعادة التدوير
بدأت عن طريق بوستات وفيديوهات تعليميه بعملها وبنشرها عالسوشيال ميديا لحد ما بقت إيڤنت بيتعمل علي أرض الواقع كل فتره .
لحد دلوقتي لسه عندى كتير أقدر أقدمه بحلم يكون عندى برنامج اقدم فيه اللي بعمله ف #مبادرة_شقلبي_دولابك
وبحلم بالعالميه وبجتهد ع أوصلها ?
Viewing 0 reply threads