الرئيسية المنتديات شاركي قصتك بالإرادة اتحديت الظروف

  • شاركي قصتك

    Shimaa تحديث قبل 3 سنوات 1 الأعضاء · 1 مشاركة
    • Shimaa

      مشارك
      26 مارس، 2021 الساعة 10:40 م

      اسمي شيماء محمد ، قصتي بدأت من 10 سنين في كفر الشيخ لما اتعرضت لحادث ومن وقتها بقيت مستخدمة كرسي متحرك ، ساعتها حياتي اتحولت تحول كبير وطبعاً مكانش الموضوع سهل عليا في الأول ،

      وأنا لسه في أوائل العشرينات وبنت مفعمة بالحيوية والنشاط وكنت بلعب رياضة في استاد كفر الشيخ وبمثل في قصر الثقافة ،

      كل ده اتغير في لحظة وافتكرت اني هقف لغاية هنا ومش هعرف أعمل أي حاجة بحبها تاني

      وكان قدامي اختيار اني أستسلم وأقعد في البيت حبيسة الكرسي وأنعزل عن العالم

      أو أختار اني أخلي الكرسي هو وسيلة انطلاقي لأحلامي وأرسم طريق جديد في الحياة وأملاه إرادة وأمل.

      وعشان دايما كان عندي إصرار وعزيمة اني أوصل لكل اللي انا عوزاه

      اخترت الاختيار اللي هيخلي لحياتي معنى وهدف.

      بدأت العلاج بعد الحادثة والعمليات ، وفي نفس الوقت قررت أتعلم أعتمد على نفسي في كل حاجة في يومي كله.

      قررت أنزل أواجه المجتمع بالكرسي وأثبت إن أقدر أحقق أحلامي ، وسافرت القاهرة وقررت الاعتماد على نفسي

      لعبت رياضة زي السباحة وتنس الطاولة والجري بالكراسي وشاركت في نشاطات تطوعية

      وأخدت تدريب مساواة الإعاقة من الهيئة الدولية اليابانية (JICA ) وتمكنت إني ابقى مدربة رسمية وبدأت أعمل توعية لمؤسسات وشركات كتير عن المساواة والدمج في المجتمع ، وبعدها جه وقت الشغل ..

      نزلت بنفسي أدور على شغل في شركات وبنوك ، واترفضت عشان الكرسي مرة ومرة عشان طبيعة الشغل مش هتناسبني ، وكتيييير عشان مكان الشغل مش مؤهل للكرسي المتحرك

      مفيش رامب (مطلع للكرسي) أو اسانسير أو المكان نفسه مش واسع وحاجات تانية كتير.

      مستسلمتش لغاية ما اشتغلت في شركة كبيرة قعدت فيها سنة أخدت فيها خبرة كويسة في مجال الموارد البشرية بس مشيت عشان أحلامي كانت أكبر وعندي طموح اني أطور من نفسي أكتر

      دخلت أماكن كتير واشتغلت في كذا مكان بس أهم حاجه عملتها في كل مكان بروحه انهم بيزودوا الاتاحات والتسهيلات وبيأهلوا المكان لدخول وخروج الكراسي واني بغير تفكيرهم عن مستخدمي الكراسي المتحركة وبسيب انطباع اننا قادرين نعمل كل حاجة بس بطرق مختلفة.

      واننا عندنا طاقات وقدرات وامكانيات نقدر ننافس وننجح بيهم بعيداً عن الكرسي.

      وحالياً أنا بشتغل HR specialist في شبكة قنوات dmc بقالي حوالي 4 سنين

      ودايما بشوف ان أهم رسالة أقدمها للمجتمع بتكون من خلال نزولي ومشاركتي على أرض الواقع واني أدمج نفسي في المجتمع رغم كل العوائق والصعوبات اللي ممكن أقابلها.

      ان الناس تشوفني بخرج وبشتغل وبنجح وبلعب رياضة وبعمل كل حاجة زيهم ، ده بيغير في نظرتهم وتفكيرهم ويبصولي أنا مش للكرسي المتحرك.

      ورسالتي ان أي حاجة صعبة بنمر بيها لازم نتخطاها ونتحدى الظروف ومنستسلمش ، الحياة مش سهلة بس بإيدنا نعيشها بالطريقة اللي بنتمناها.

Viewing 0 reply threads
الرد: Shimaa
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن