شاركي قصتك
تحديث قبل سنة، 12 شهر 2 الأعضاء · 2
منشورات 
عندي ٤١ سنه – ام لبنت جميله عندها ١٤ سنه و هي السبب اني بكتب لكم.
البدايه جواز ٢٥ سنه و طلاق ٢٧ سنه و single mama زي ستات كتير قوي في مصر يعني قصه عاديه كنت وقتها معنديش شغل بدخل ثابت و ربنا كرمني و اشتعلت في شركه محترمه و جبت عربيه و دخلت بنتي احسن مدارس و كمان قابلت حب عمري بعد ٧ سنين طلاق و اتجوزنا و بنتي معايا و الحياه مشيت شويه سهله و شويه صعبه على ما عرفنا نظبط العلاقات.
المهم بعد ٣ سنين و انا ٣٧ سنه كنت بفكر نجيب طفل خاصه ان جوزي معندوش اولاد و في نفس الشهر اكتشفت اني عندي سرطان ثدي مرحله رابعه منتشر في العظم ?? و هنا بقى دخلت ليفل الوحش …
مش هضحك عليكم و اقول لكم اني زعلت اول نعمه من عند ربنا كانت الرضا و لو اتعلمت حاجه من تجربه الطلاق انه سواء رضينا او لا قضاء ربنا نافذ ?
الحقيقه كانت مفاجاه لاني اقل من ٤٠ سنه و معنديش تاريخ عائلي للمرض و كمان الورم صغير جدا بس مشاء الله دخل من الغدد الليمفاوية العظم و انا اصلا معنديش اعراض !
بدانا رحله العلاج من دكاتره لاشعاع على العظم لعمليه و بعدين اشعاع تاني و كان عندي يقين اني هخف رغم كل المعطيات و الرحله دي كان كرم ربنا في الناس و جوزي و بنتي و الدكاتره الي ربنا بيوقفهم و فعلا قعدت ١٨ شهر من غير سرطان في جسمي!
بعد كده كان عندي مسح ذري و انا لازم اعمله كل ٣ شهور علشان النوع الي عندي شرس شويه و كان قبل رمضان على طول الي اتعرض فيه مسلسل حلاوه الدنيا ? بصراحه اجلت لبعد رمضان كنت عارفه انه رجع مجرد احساس و طبعا لقيته رجع في العظم في اماكن كتير و دخلتا ليفل الوحش رقم ٢.
بسرعه غير العلاج لنوع تاني غالي جدا و ٣ شهور نشوف التأثر بتاعه ملحقتش اكملهم دخلت المستشفى انقاذ حياه لان الورم مستجابش للعلاج و ضرب الفقرتين القطنيتين الي شايلين الجسم يعني ممكن اتشل – قعدت اسبوعين في المستشفى باخد اشاع مكثف علشان يسيطروا على الورم و الوجع و احتمال امشي او لا عند الله انا اصلا مكنتش بعرف اقوم و اقد و ادخل الحمام بس كل الي في دماغي اني عندي ايفينت في الشغل بعد ٣ اسابيع و عايزه الحق اخف علشان اروح ? والله انا بفتكر بقول اكيد ليهم حق يعتبروني مجنونه ساعتها انا كنت في داهيه بس رحمه ربنا اني بتعامل معاها على انها وعكه صحيه – و على فكره خرجت و رحت الايفنت و مشيت و بعد رحله طويله وصلت ل٤٠ جلسه كيماوي قابلين للزياده و اشعاع و تحاليل والام انا لسه موجوده و بكتب لكم.
انا اكبر انجاز في حياتي اني اصحى من النوم و انزل من السرير والله العظيم دي الحرب اليوميه لاي مريض سرطان بيحارب نفسه و الامه و يقوم ينزل يحاول يعيش طبيعي هو ده انجازي الي كتير بنجح فيه و احيانا بفشل و اوعوا تفتكروا انها حرب سهله كفايه بس انك تعيش مع فكره الموت يوميا و طبعا الاقدار في ايد ربنا ?
الصحه اكبر نعمه في حياتنا ما بيحسش بيها غير الي فقدها – انا مش بطله لاني مع رحله المرض شوفت قصص كتير تستحق الاعجاب بس علشان نوصل للاعجاب ده في حرب اكبر بكتير من تخيل حد – فكره التعايش مع مرض مميت ملوش علاج و كل يوم الليفل بيصعب عليا -الحرب النفسيه الداخليه لما بشوف بنتي و السؤال يا تري هكون معاها قد ايه ؟ الادويه و اثارها الجانبيه و علاج كمان عوارض العلاج ماهو مفيش حاجه مش بتضر حاجه – و اكتر حاجه بتوجعني رحلتي الشهريه لمعهد الاورام علشان اصرف المسكنات / مخدرات لما بشوف المرضي على السلالم ووجعي عليهم – بخرج اقول لنفسي انا في نعمه على الورق حالتي ممكن تكون اسواء من ناس كتير من الي بقابلها بس شكلي ميدلش على كده و دي لوحدها نعمه من ربنا.
اخدت كيماوي وشعري وقع ايه يعني حلقته و مشيت بيه عادي – عندي الام رهيبه جسمانيه الحمد لله ان المسكن بيجيب نتيجه – لما اطلقت ربنا كان شايل لي الاحسن في راجل بيحبني وواقف معايا و اكيد علشان ربنا عادل بنتي ليها نصيب في حاجه جميله علشان الي بتحسه و بتعيشه دلوقتي.
انا مش بطله بس و انا في العربيه من اسبوع قبل عيد الام بيومين و سمعت الاعلان بتاع واحده جديده ساره قالت لي ( مامي لازم تبعتي ليهم انت عندك سرطان و راجعه من الشغل و مسافرين على الطريق رايحين لتيتا و بتتخانقي مع العملاء – انتي لازم تبعتي لهم ) بصيت لها و حسيت ان لو انجازي الوحيد في الحياه انها تشوفني كده – يبقى انا نجحت ?
انا اكبر انجازاتي اني اقوم من النوم و اواجه نفسي بافكارها المتخبطة و اواجه الامي الجسديه المتفرقة و احاول اعيش يوم طبيعي و اكسب في الحرب التي لا يعلمها الا الي زيي من المرضى !
انا اسمي دعاء و بدخل حرب كل يوم و بحاول اكسب و احيانا بخسر بس هكمل ?
ربنا يعافيكى وان شاء الله هتخفى يكفى انك مستسلمتيش
Viewing 1 reply thread