الرئيسية المنتديات شاركي قصتك انني اخوض حربا لا تعلمون عنها شيئا

  • شاركي قصتك

    Doaa تحديث قبل سنة، 8 أشهر 1 الأعضاء · 1 مشاركة
    • Doaa

      مشارك
      26 مارس، 2021 الساعة 12:26 ص

      اسمي دعاء و عندي ٤١ سنه ام لبنت جميله عندها ١٤ سنه و هي السبب اني بكتب لكم – كنا في العربيه و سمعنا الاعلان و قالت لي مامي لازم تبعتي ليهم ؛ بالنسبه ليها انا بطله و ده كفايه بالنسبه لي.

      حكايتي من وجهه نظري حكايه ستات كتير في مصر اتجوزت باباها و انا عندي ٢٥ سنه و اطلقنا و انا عندي ٢٧ سنه و بقيت single mama زي ستات كتير في مصر كنت ساعتها بشتغل شغل مش بمرتب ثابت و شقه ايجار و مفيش عربيه بس عادي مكنتش بشوف حاجه صعبه لقيت شغل تاني و اخدت قرض و اشتريت عربيه حاولت اسيب علاقه كويسه مع اهل باباها علشان بنتي بغض النظر عن اسباب الطلاق كنت دائما بشوف ان بنتي مش طرف و مش ذنبها اننا اختارنا غلط سواء للراجل او الست غالبا الغلط بيكون من الطرفين ؛ بعد حوالي ٧ سنين قابلت حب حياتي و اتجوزنا و طبعا الحياه علشان تستقر بين ام وبنت و راجل متجوزش قبل كده و علاقات معقده اخدنا وقت كتير لحد ما الحياه بدات تستقر بس طبعا دي بس احلام? هوبا و انا عندي ٣٧ سنه اكتشفت ان عندي سرطان ثدي مرحله رابعه يعني الترجمه منتشر في العظم. بعد لفه صغيره على الدكاتره بقت حقيقه في حياتي و يلا بينا بقى لليفل الوحش ? بصراحه مزعلتش ولما قعدت مع نفسي وصلت لسلام داخلي من الاول خالص انا اتعلمت ايه من الي فات ؟ اتعلمت اني لما زعلت و تعبت من تجربه الظلم في الطلاق مفيش حاجه اتغيرت انا مش هعرف حكمه ربنا و اكيد سبحانه عارف بيعمل ايه، معرفش ازاي وليه رضيت و مزعلتش بس الي كنت متاكده منه ان قضاء ربنا فيه رحمه و من هنا بدأت الحرب التي لا تعلمون عنها شيئا و حقيقي لازم اقول لكم هنا ان الصحه مهمه مش بيحس بيها غير الي بيفقدها ! الحرب بتبدأ كل يوم الصبح اني انزل من السرير و اروح شغلي او اني اتواصل مع اي حد.

      خليني اقول لكم الاول انا عملت ايه مع السرطان مبدأيا ورمز صغير جدا انتشر بسرعه قبل سن ال٤٠ و معنديش تاريخ عائلي يعني معادله مش حلوه بس ربنا وفقني و مشيت في خطه علاج بين الاشعاع على العظم و بعدين عمليه و الحمد لله كنت clear من المرض لمده ١٨ شهر لحد شهر رمضان في ٢٠١٩ اوبا رمضان هل و كان المفروض اعمل مسح ذري قبله و مرضيتش و كان ده رمضان الي فيه مسلسل حلاوه الدنيا ? ثم بعد رمضان مسح ذري و المرض رجع تاني في العظم و دخلنا مرحله علاج ٣ شهور مكملتهمش و دخلت المستشفى انقاذ حياه- المرض رجع انتشر في العمود الفقري و اكل الفقرتين القطنيتين.

      لازم كيماوي و بما اني نايمه على جنب واحد مش بتحرك من الالم و مش قادره احرك رجلي يبقى لازم اشعاع. و انا في المستشفى كان عندي event في الشغل بعد ٢١ يوم في شرم الشيخ و فاكره اني بقول لازم اطلع قبله علشان عايزه اروح ! طبعا الناس حوليا شايفين اني مجنونه لاني مش بتحرك و بعد ما خرجت عرفت من الدكتور انه كان عنده احتمال كبير اقضي حياتي على كرسي بس انا مكنتش بفكر كده خالص شيفاها وععكه صحيه عادي يعني و ده غالبا من المخدرات الي كنت باخدها ? و هنا بدأت ليفل ٢ من الوحش.

      خرجت و مشيت و بدات كيماوي و على فكره رحت الايفنت ! و هنا بدأت استوعب مع الكيماوي ايه ده الموضوع مش تهريج و اكيد الي انا بعمله الناس لازم تشوفني مجنونه شعري وقع بلبس باروكه وقع و بروح الشغل باخد كيماوي و بتعامل معاه على انه العلاج المزمن بتاعي و بعدين زهقت من الباروكه و حلقت شعري و برده مكمله بس صدقوني ده مش سهل و هنا هرجع للحرب بتاعه اي مريض الي حقيقي لا تعلمون عنها شيئا !!

      انا فعلا بحارب و بعد ٤٠ جلسه كيماوي و كميه لا بأس بها من المخدرات مع كثير من الالم الجسدي و المعنوي بيبقى انجازي اليومي اني اعرف اقوم من السرير والله العظيم اني اقوم و اواجه الحقيقه كل يوم ان عندي مرض قاتل مرحله رابعه اني ممكن في اي وقت اخسر الحرب و تسيب بنتي و جوزي و امشي و اني و اني … الحرب النفسيه صعبه قوي و احيانا كتير بخسر و ينهار – في رحلتي الشهريه لمعهد الاورام علشان اصرف المسكنات/ مخدرات و بشوف المرضي على السلم و في طرقات المعهد بخسر الحرب و انا بتألم بخسر الحرب بس برجع و اقول الحمد لله ? بجد الحمد لله على كل لحظه انا عيشتها و كل الم بيكفر ذنوب? الحمد لله ان شكلي ميدلش خالص على حالتي و الحمد لله ان ربنا مديني القوه و مديني ناس جنبي و مديني حاجات كتير اهمها ان كل يوم بعيشه بعلم بنتي ازاي تكون قويه و ده الي خلاني اكتب لكم انهارده لما هي قالت لي لازم تقولي لهم انك عندك سرطان و جايه من الشغل و بتخانقي مع العملاء في العربيه و احنا مسافرين على الطريق الزراعي رايحين نزور تيتا و بتضحكي !!

      لما سمعتها حسيت بنعمه ربنا لما شفت هي شايفتني ازاي و لو ده هو انجازي الوحيد في الحياه يبقى انا فعلا نجحت- الصحه نعمه بجد قدروها و بلاش تزعلوا و اوعوا تفتكروني بطله لان في زيي كتير قوي محاربات و كلهم عندهم قصه ؛ بس الي انا متأكده منه اني بحارب كل يوم علشان اقوم من السرير حرب نفسيه و جسديه و كتير بكسب و كل ما الوقت بيعدي بروح لليفل اصعب بس بحاول اكسب حربي اليوميه مع نفسي اني اقوم من السرير و اواجه يوم جديد و ده انجازي!

Viewing 0 reply threads
الرد: Doaa
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن