الرئيسية المنتديات شاركي قصتك انا وبابا والتحدي

  • شاركي قصتك

    Yasmin تحديث قبل سنة، 8 أشهر 1 الأعضاء · 1 مشاركة
    • Yasmin

      مشارك
      15 مارس، 2021 الساعة 1:48 م

      بدات قصتي بعد وفاة اغلي الناس عندي بابا انا بنت و عندي اخ كبير و اخت تانيه بابا كان كل حاجه لينا بعد ربنا و امي طبعا.

      بدات مشكلتنا و انا في 3 ثانوي لما بابا تعب فجاه و رحنا للدكتور و قالنا انه لازم يعمل قلب مفتوح في اسرع وقت لان حالة القلب ضعيفه جدا هنا بابا ساب الشغل و بدانا مشوار العلاج و عمل العمليه علي نفقه الدولة لاننا علي اد حالنا اوي و ماما كانت موظفه في الحكومة يدوب مرتبها بيكفينا لحد ما قررارنا انا و اخويا ننزل ندور علي شغل اي شغل نجيب بيه اي دخل لاسرتنا.

      الحمدلله ربنا كرمنا بشغل في محل بيرفيوم بيبيع للاجانب و الحمدلله قدرنا نساعد ماما في مصاريف البيت.

      لحد ما فيوم بابا تعب تاني بس المرة دي مش القلب، طلع عنده فشل كلوي بسبب ادوية القلب.

      و للاسف غسيل الكلي لا يدعم من الدولة خاصة في حالة بابا كنا بنموت كل يوم بسبب تعبه و ان احنا مش عارفين نعمله حاجه.

      اشتغلت شغل تاني جمب شغلي و كنت بفصل مفارش تيريكو و ببعها و بدي فلوسها لامي و فضلت احارب معاهم لحد ما في يوم بابا كان لازم يدخل المستشفي و محتاجين فلوس للتامين، كل عمامي شالو اديهم و انا كنت مخطوبة في الوقت دة، بعت شبكتي بعد ما استاذنت خطيبي و اديتهم لماما و بابا دخل المستشفي بس للاسف مفيش اربع ايام و سمعت اصعب خبر في حياتي كلها، اغلي حاجه عندي مشيت و راحت عند ربنا صدمة عمري.

      الخبر كان صعب علينا كلنا و الاصعب اننا ملقناش الي يقف جمبنا غير ربنا.

      بعد فترة كبيرة كان معاد جوازي قرب و مكنتش مجهزة نفسي بس دة مقصرش فيا لاني اشتغلت و بدات اكبر في شغلي و عملت مشروع بدا صغير و كبر الحمد لله كنت بسهر كل يوم اخلص اوردرات المفارش و الحاجات الي بتطلب مني و اسمي اتعرف الحمدلله ، و من هنا جهزت نفسي و جهزت اختي الي كبرت و هتبقي احلي عروسة ان شاء الله.

Viewing 0 reply threads
الرد: Yasmin
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن