الرئيسية المنتديات شاركي قصتك النجاح بعد الــــ 35

  • شاركي قصتك

    بيري تحديث قبل سنة، 8 أشهر 1 الأعضاء · 1 مشاركة
    • بيري

      مشارك
      26 مارس، 2021 الساعة 12:40 ص

      النجاح بعد الـــ 35

      هذة هي قصتي و أتمنى ان تكون “مُلهِمَة” لكل سيدة بعد سن الــ 35… السن الذى يعتبره الكثيرين منا “نهاية” المطاف…

      انا سيدة مصرية معايا بكالوريوس تجارة. أهلي كانوا رافضين فكرة الشغل نهائي. وجلست في إنتظار العريس المنتظر لأستطيع تكملة حياتي “هذا ما إعتقده أهلي”. ثم تزوجت وأنجبت طفلي الأول و إنفصلت وكان عمري 26 عامآ. رفضت الزواج مرة أخري كي لا أواجه صدمة الفشل مرة أخري.. بعد 5 سنين إتعرفت على زوجي التانى عن طريق أصدقاء للأسرة. كان شخص مختلف “فهو يحمل الجنسية البريطانية بجانب المصرية” وأكبر منى بـ “22 عامآ” أعتقدت انه هيعوضنى عاللى شفته في السنيين اللى فاتت من تعب وشقا ومسؤلية… ولكن للأسف مش دا اللى حصل.. بعد ما أنجبت بنتي بدأت العاصفة في حياتي التي ظلت 9 سنوات .. من معاملة سيئة لإبنى اللى من زوجى الاولاني إلى “ذل” لأنه بيصرف عليا ومعيشني في “بيت”.. إلي ورقة طلاقي الغيابي “لإنه كان بيحب المفاجأت الصادمة” على يد محضر… وقالي عايزة مصاريف ؟؟ يالا قدامك المحاكم.. وريني هتجيبلك كام..

      فالوقت دا انا كنت معايا بكاوريوس تجارة قسم عربي وعمرى ما اشتغلت .. يعنى نسبة إنى الاقي فرصة شغل عشان اصرف على البيت وعلى طفلين “صعبة جدآآآ”…. لم اكن املك 100 جنية بتاعتي.. ومعايا ولد وبنت..

      كان عندي خيارين ليس لهم ثالث.. إما أن أكون سيدة قوية أو أكون سيدة ضعيفة .. وكان إختياري هو أن أكون إمرأة قوية.. هنا بقي كل ست لازم تقرأ الجزء دا كويس جدآ.. “مفيش حاجة إسمها مستحيل.”

      قررت انى هتعلم إنجليزي من الصفر… وقتها كان عندي 35 سنة.. ماكنتش بعرف اعمل جملة واحدة صح.. كان ممكن اقعد يوم كامل عشان افهم كلمتين انجليزي على بعض… وبدأ التحدي .. وكانت النتيجة:

      1- إتعلمت إنجليزي لغاية ما بقيت في المستوي المتقدم.

      2- حصلت على شهادة TEFL في تدريس اللغة الإنجليزية بتقدير ممتاز وتفوقف على زمايلي خريجي كليات اللغة الانجليزية .

      3- إشتغلت كمدرسة لغة إنجليزية بإحدي مدارس اللغات .

      4- حصلت على منحة من UNICAF لدراسة الماجستير في التدريس من جامعة South Wales في بريطانيا.

      5- أعمل كمدربة لغة إنجليزية منذ سنوات ..

      6- أصبح عندي البيزنس الخاص بتاعي.. أنشأت صفحتي بالفيس بوك (إتكلم إنجليزي مع بيري).. و قمت بتدريس اللغة الإنجليزية لطلاب كتييرعلى مستوي الشرق الأوسط – منهم دكاترة و صيادلة و مدرسين فالجامعة – .

      الأن !!!

      – أقوم بتدريس اللغة التى لم أكن أفهم منها حرف واحد من قبل…

      – دخلي الشهرى ثلاث اضعاف الدخل الى كان طليقي يعطيه لى “بالذل”..

      – حصلت على درجة الماجستير في التدريس من بريطانيا..

      برغم كل الظروف الصعبة اللى مرت عليا .. كان دايمآ عندى إحساس إنى مش عايزة أستسلم للظروف دى و مش عايزة أكون ضعيفة, كنت بقول إن التحدى هو إنك تنجح وإنت في ظروف صعبة زى دى, مش إنك تنجح وانت كل الظروف متهيأة ليك.

      رسالتى إلى أى سيدة مطلقة او متزوجة وتعول أسرتها…

      عايزة اقولها مفيش مستحيل, مفيش حاجة اسمها (انا كِبرت)..

      – زى ما انا قدرت اعمل حاجة لنفسي وانجح وافتخر بنجاحى وإصرارى, إنتى كمان تقدرى تنجحى وتتباهى بقدرتك على تحقيق احلامك.

      النجاح بيغير حاجات كتيير فحياتِك يمكن ساعات ماتكونيش واخده بالِك منها…

      إستقلي ماديآ .. هتدوقي طعم حلاوة الدنيا بجد.. يالا إبتدي حتي لو بعد الـــ 35

Viewing 0 reply threads
الرد: بيري
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن