الرئيسية المنتديات شاركي قصتك السرطان غيرلي حياتي خلاني واحدة جديدة

  • شاركي قصتك

    Fatma تحديث قبل سنة، 8 أشهر 1 الأعضاء · 1 مشاركة
    • Fatma

      مشارك
      28 مارس، 2021 الساعة 7:55 م

      #تجربتي

      اسمي :فاطمة محمد الفقي

      معلش هطول عليكوا ??

      انا لحد سنة 2014 انا كنت بنت عادية جدااا

      وخجولة جدااا وكنت بخاف قوي من كلام الناس وبعمل حسابهم وده كان بيخليني بعيد عنهم ومحسسني اني ضعيفة

      بس كان فيا حاجة كويسة

      اني بحب كل فترة اعمل تحاليل اطمن على نفسي وشجعني في ده ان في معمل محترم جدا في نفس العمارة اللي انا ساكنة فيها

      مرة من المرات اللي حللت فيها وده كان في شهر سبتمبر 2014 التحاليل كان فيها الخلايا الليمفاوية عالية والدكتورة اللي اديتني النتيجة قالتلي بصي في حاجة مش مزبوطة فا لازم تكشفي

      روحت لدكتور باطنة شاف التحاليل وكشف عليا وبعدين قاللي ماتقلقيش بس روحي لدكتور دم عشان تطمني اكتر

      بصراحة انا كنت اول مرة اسمع ان في حاجة اسمها دكتور دم واستغربت وسألت كذا حد بس وقتها معرفتش اوصل لدكتور امراض دم فا بصراحة سكت مادورتش تاني قولت انا تمام يعني مش هكبر الموضوع

      وبعد فترة عملت التحليل تاني بس المرادي الدكتورة مرضتش تديني النتيجة وقالتلي الدكتور صاحب المعمل عاوز يتكلم معاكي استغربت وقتها بس ما قلقتش

      المهم دخلت للدكتور طلع من على الكمبيوتر عنده الفايل بتاعي في تحاليلي القديمة وقاللي بصي الخلايا الليمفاوية بتزيد كل مرة فا احنا عاوزين نطمن ده سببه ايه بس

      فقولتله حاضر هروح لدكتور امراض دم الكلام ده في يناير 2015 دورت تاني على دكتور معرفتش اوصل روحت حللت تاني اخر شهر فبراير عشان اشوف زادت تاني ولا ايه والدكتور طلبني تاني وقاللي ازاي مكشفتيش انا مش عاوزك تقلقي بس لازم نفهم هي بتزيد ليه قولتله طيب رشحلي دكاترة عشان انا معرفش حد دكتور دم فعلا جابلي كذا اسم دكتور وارقام تليفوناتهم واتصلت بواحد منهم وفعلا روحتله وتابعت معاه وطلب مني مجموعة من التحاليل والاشعات في منهم تحليل مش بيتعمل في معامل كتير فرشحلي معمل الباثولوجي في كلية الطب

      وفعلا عملت كل التحاليل المطلوبة في المعمل اللي بتعامل معاه ماعدا التحليل الباثولوجي ده وخلصت اشعاتي وروحت كلية الطب عشان اعمل التحليل

      الدكتورة بصت فالورقة كدة وراحت بصالي

      _ ايه ده هو طالب التحليل ده ليه

      _عشان الخلايا الليمفاوية عددها كبير

      _انتي عندك كام سنة اكيد في حاجة غلط

      _ليه في ايه

      _لا مافيش تعالي ناخد العينة وخدي تليفوني وكلميني كمان يومين عشان لو احتاجنا عينة من رقبتك

      _?رقبتي

      _ماتقلقيش

      _حاضر

      واخدت الموضوع عادي ومقلقتش قوي قولت حاجة بسيطة

      واتصلت فعلا بعد يومين قالتلي لا خلاص عينة الدم نفعت تعالي خدي النتيجة يوم 21

      الكلام ده كان في مارس 2015

      وفعلا روحت لوحدي اخد النتيجة يوم السبت 21 مارس 2015

      يوم عيد الام

      الدكتورة جايبالي النتيجة وبقولها ايه الاخبار

      قالتلي بصي الحمد لله احنا كنا شاكين في ليمفوما (وانا طبعا جهل الدنيا معرفش يعني ايه ليمفوما اللي هي سرطان غدد ليمفاوية بس انا طبعا معرفش ) بس الحمد لله ماطلعتش ليمفوما قولتلها طيب الحمد انتي خضتيني على نفسي المرة اللي فاتت فكرت عندي سرطان ?

      هي سكتت وبصتلي جامد فا انا لاول مرة اقلق بجد كل اللي فات ده كان هزار

      وراحت قالتلي بصي هو نوع من انواع السرطان ………………

      مش فاكرة هي قالت ايه بعد كدة

      كل اللي جه في بالي ساعتها اللي بيجي فالاعلانات والمسلسلات والافلام عن مريض السرطان انه تعبان طول الوقت وشكله بيتغير وشعره بيقع و………… بيموت

      سيل دموع طبعا نزل من عنيا بس اول حاجة قولتها وهي بتحاول تطمني هي الحمد لله

      زي ما قولتلكوا انا كنت لوحدي خرجت من المستشفى مشيت مشوار طويل وبعدين فضلت افكر هقول لماما ايه

      متخيلين اني اقول لمامتي عندي سرطان هجيبهالها ازاي

      اتصلت بواحدة صاحبة ماما قولتلها طنت الدكتورة بتقول اني عندي سرطان . قالتلي تعاليلي روحت خلصت كل العياط عندها وبعدين روحت

      ماما سألتني: ها نتيجة التحليل ايه قولتلها معرفش الدكتور بكرة يقوللي ان شاء الله

      ويومها فكرت مع نفسي كتير كنت من فترة شوفت فيديو لبنت جميلة اسمها ندى شاتيلا وكانت عايشة مع المرض ومتعايشه معاه بقالها 10 سنين وبعدين بصيت لنفسي ما انا كويسة اهو هو يعني عشان عرفت اني جالي سرطان هتعب بقى ولا ايه ما انا كنت الصبح قبل ما اعرف زي الفل

      وافتكرت الاية الكريمة “لا يكلف الله نفسا الا وسعها “

      قولت على كدة انا جامدة قوي بقى وانا معرفش

      اكيد انا جامدة جدا طالما ربنا اداني حاجة كبيرة كدة

      فعلا وقتها حسيت اني اتحولت وقررت اتعامل على اساس الشخصية الجديدة اللي انا لسة متعرفة عليها دلوقتي (فاطمة القوية) وبس كنت محتاجة افهم اكتر

      وروحت للدكتور تاني يوم وشيلت تحليل الباثولوجي للاخر ووريته كل التقارير والتحاليل التانية وهو

      _جميل . تمام . كويس قوي . ما احنا كويسين اهو

      رحت مطلعة تحليل الباثولوجي وقولتله وانا بضحك

      _ شوفت ده .

      _ليه كدة بقى .

      _شوفت بقى .

      _عموما ماتقلقيش احنا في مرحلة كويسه وانتي ربنا بيحبك انك اكتشفتي بدري

      النوع بتاعك اسمه لوكيميا ليمفاوية مزمنه

      اهم حاجة ان احنا نبقى مسيطرين وحالتنا النفسية تبقى كويسة و……..

      وشوية كلام دكاترة كدة كتير بس بصراحة طمني

      ومن بعدها بقى قررت ابقى سعيدة واغير حياتي وده اللي بدأت اعمله فعلا

      وقتها انضميت للجمعية المصرية لدعم مرضى السرطان واتعرفت على مرضى كتييير

      ودي حاجة كانت حلوة ووحشة في نفس الوقت

      حلوة عشان احنا كنا بندعم بعض وبنقوي بعض وبنعمل انشطة كتير

      وحشة بقى عشان كان كل فترة مش قليلة كنت بفقد صديق منهم

      وده كان بيوجعني قوي

      انا كنت باخد الأول كيماوي كان عبارة عن برشام

      وبعدين بعد فترة مع فقداني لاصحابي حالتي النفسية سائت وجالي اكتئاب

      قررت اتعالج من الاكتئاب وبدأت فعلا بس للأسف الحالة النفسية اثرت على نتايج التحاليل واضطريت اخد كيماوي وريد

      قررت ارجع تاني قوية عشان اعدي المرحلة دي

      بس و اول ما بدأ شعري يقع ويطلع بالخصل كدة روحت ماسكة مكنة الحلاقة وشايلاه

      هو انا لسة هستنى ?

      مش عاوزة اقلكوا والله كنت مستريحة من حاجات كتير تسريح بقى وشامبو وبلسم وماسكات الشعر وروتين الشعر الممل ده

      يا سلام وقت الشاور والماية نازلة عالظلبتة الناعمة دي احساس رائع بالتراوة ????????

      وكمان لمدة ست شهور كنت مرتاحة من حاجات تانية انتوا عارفينها بقى ?

      نسيت اقلكوا

      واني قبل ماخد الكيماوي الصعب ده بصراحة لقيت اكتر وقت ببقى سعيدة فيه هو العمل الاجتماعي و الخيري

      انا بتعالج في الصرح العظيم مستشفى ايادي المستقبل هنا في اسكندرية وفي نفس الوقت كنت متطوعة في مكتب اصدقاء المرضى بالمستشفى وبيبقى في نشاطات كتيرة للمرضى وزي ماقولتلكوا

      انضميت وقتها للجمعية المصرية لدعم مرضى السرطان

      وانا ياللي كنت بخاف اواجه الناس طلعت قدام عدد كبيييير جدا من الناس اتكلمت في مؤتمر السرطان من منظور المرضى وكمان عرضت فستان في اول عرض ازياء لمريضات السرطان في مصر

      وعرض الازياء ده كان سبب تعرفي على شخصية جميلة جدااا اسمها Marwa Hafez كانت بدأة مبادرة اسمها #انا_مصراوية وكانت بتجمع مجموعة من افضل سيدات الاسكندرية

      دخلت معاها المبادرة وعملنا انشطة كتير والحمد لله وبفضل ربنا المبادرة بقت مؤسسة مشهرة وليها نشاط وعضوات في محافظات كتير

      وانا انتخبت من اعضاء مجلس ادارتها اني اكون رئيسة لجنة المشروعات الصغيرة بالمؤسسة

      وبعدين بقيت الامين العام للمؤسسة

      ومش عاوزة اقولكوا اكتر ناس وقفت معايا بجوار اهلي وقت الكيماوي وكانوا بيجولي وقت الجرعات هما عضوات المؤسسة اللي عمري ابدا ما هنسالهم جميلهم ده ولا دلعهم ليا اللي كان بيحسسني كل جرعة اللي كانت بتبقى 3ايام كل شهر فالمستشفى اني رايحة رحلة والله

      الحمد لله انا احسن دلوقتي وحالتي مستقرة وشعري طلع وطول كمان بفضل الله

      #الفكرة

      فكرتي وكلمتي اللي عاوزة اقولها للناس تتلخص في الاية اللي انا افتكرتها يوم ما عرفت ” لا يكلف الله نفسا الا وسعها ”

      انت ربنا بيديك على قدك والله اوعى تقول انا مش قدها اوعى حاجة تهزمك كل حد جواه حد لسة ما اكتشفهوش ولازم يدور عليه ولازم احنا اللي نحللي دنيتنا

      فاطمة الفقي

      محاربة لوكيميا ليمفاوية مزمنة

      • هذا الموضوع تم تعديله في قبل سنة، 8 أشهر بواسطة Fatma.
Viewing 0 reply threads
الرد: Fatma
المعلومات الخاصة بك:

إلغاء
Start of Discussion
0 من 0 منشورات حزيران / يونيه 2018
الآن