شاركي قصتك
تحديث قبل 3 سنوات 0 الأعضاء · 1
مشاركة 
انا شوفت أيام كتيرة غريبة في منها اللي اقدر أحكي عنه و ساعات يومي بيكون غريب طويل
ربنا رزقني بإبني كان عمري ٣٦ سنة و كانت ولادة صعبة تشخيص غلط و وقت صعب في عمر الزمن كنا في طوارئ و ماكنتش فيه مستشفيات إلا مستشفي واحدة اللي بتستقبل حالات الولادة كنت انا و جوزي و خالتي بندور علي تاكسي بعد نص الليل و انا في حالة حرجة و الطبيب اللي مفروض اولد عنده رفض يتحمل مسؤليتي و بعد ١٢ ساعة متابعة قاللي انا اسف ?
الغريبة اني مصرختش خالص كنت كتومة و مكسوفة بس كنت بكلم ربنا و اسبح و أدعي وصلنا المستشفى و دخلت لوحدي ساكتة وزني كان زايد جدا لكن اللي في المستشفى اول مرة يشوفوني دخلت بمنتهى الهدوء بضحك و اهزر ليلة صعبة و الاستاف مجهد والساعة ٢ باليل و انا بضحك قالوا دي شكلها لسه عليها شوية
عمري ما هنسي دكتور النوباتجي و هو يسألني علي التفاصيل و انا برد و اسكت بس ساعة الألم الطلق اسمك
سنك
لما لقي سني كبير استغرب انها اول ولادة سألني اتجوزتي قبل كدا قولت ايوة مخلفتيش ليه
ماكنش عايز عملتي سونار آخر مرة امتي قولت من ساعة بص لي بإندهاش قولت الدكتور رفض يتحمل مسؤوليتي و مش معانا فلوس كفاية و مافيش مستشفيات بص بإندهاش أكتر سألني بتشتغلي إيه قولت مطربة استغرب أكتر و أكتر
قام بعد كدا يعمل فحص و إذ فجأة ينفعل و يصرخ و يرطن و بقدرة قادر لقيت ٦ دكاترة حواليه كلهم في حالة انزعاج و ارتباك و عاملين يعملوا حاجات يسحبوا دم و يقسو ضغط و يسألوني و لازم أرد و انا في حالة ما يعلم بها إلا ربنا و في لحظة انفعال مني قولت هوا ده تحقيق! رد واحد منهم بمنتهى الخوف عشان ده حمل عزيز مش عارف هضحي بمين فيكم .
الانفعال اللي حرك المكان كان غريب كل ده و ماكنتش بصرخ و صلت غرفة العمليات و كان لازم اولد طبيعي لإني خلاص فات أوان القيصرية وصل الدكاترة لحالة إنهم بيقولولي لازم أصرخ علشان إبني ييجي الدنيا و حصلت المعجزة و خرجنا أحياء انا و هوا .
الولادة الصعبة دي عملت لي حاجة نادر لما تحصل لسيدة أنجبت مرة واحدة حصللي سقوط رحمي كامل و أشياء أخري ?? عملت عملية للأشياء الاخري بعد ما فطمت إبني لكن سقوط الرحم ده عذبني ٦سنوات حالة نادرة و في أطباء ربنا يسامحهم لو يقولوا منعرفش أرحم لكن إزاي ؟
لكن الحالة كانت بتتأخر كل يوم عن التاني و الالام ربنا بس اللي اعلم بيها مسكنات الآلام كل شكل و كل نوع و للأسف الشديد المكان الوحيد اللي قال عملية طلب رقم فلكي بالنسبة ليه ما كنتش هقدر اتحمله .
و ابني كنت محرومه العب معاه زي ما كنت بحلم .
مش عارفة أفكر و لا احلم و لا اشتغل و لا أحب مش عارفة اعدي الشارع من الخوف لا رجلي تخوني .
و السقوط بقي في مرحلة متأخرة و الألم زاد و كنت خلاص عندي إستعداد لأي حل حتي لو وصل لإستصال الرحم لو ده الحل عشان اقدر امشي و اتحرك و العب مع ابني انا كنت هقبل كلمت ربنا و دعيت له .
و حصلت معجزة
بعد ما كنت خلاص مش عارفة أعمل إيه راضية بأي نهاية لألمي ربنا جبر خاطري و رحم ضعفي و عجزي .
في رحلة بحثي عن علاج و نهاية لألمي اتصلت بطبيب بتربطنا به علاقة عمل قديمة و شرحت له الحالة و قولت له خلاص انا بعجز انا شبه اتشلليت السقوط بقي منعني من الحركة مش عارفة أفكر مش قادرة اشتغل مش عارفة اعيش كنت منهارة منفعلة متألمة قاللي ما تقلقيش هرد عليك بحد أقصى شهر ،.
شهر شهر ما انا بقالي سنين تاني يوم بعت لي رقم فون استشاري نساء تواصلت معاه شرحت له الحالة بقي مش مصدق إزاي انا عايشة مع الألم و حدد معاد يبلغني إزاي و امتي نقدر نعمل العمليه بعد يوم حدد لي ميعاد مع أستاذ كبير هيوصلني لإستشاري متخصص في الجراحة اللي مفروض اعملها و فعلا روحت انا و جوزي و ابني الأستاذ الدكتور العلامة قابلني علي باب المستشفى الفخم بتاعه بمنتهى الرحمة و الاحترام و شرحت له الحكاية كلم الدكتور المنقذ و حدد معاد دخولي مستشفي كل ده و انا واقفه مذهولة من رحمة ربنا و تواصلت مع الطبيب الإستشاري المنقذ و دخلت المستشفى و عملت العملية في خلال ٣ أيام .
طبعا نقاهتي كانت طويلة لأن العملية بتحتاج عناية كبيرة و صبر و علشان تنجح و الرحم يرجع مكانه.
أول مرة مشيت بعد العملية كنت حاسة اني طايرة و لية جناح احساس الراحة و الحرية و انا بعدي الشارع كان اكتشاف رجلي مش هتخوني هأقدر اتحرك مع ابني في طريق الحياة مهما كانت فيها حاجات صعبة ممكن تعدي بألم أقل الحمد لله.
انا حاسة اني اخدت الجايزة اني قدرت أحكي دي جايزة
كل الناس الجميلة اللي اتحملتني و انا مريضة اخواتي جوزي ابني ليهم عندي حب و امتنان كبير .
في أيام معجزات صدقوني الأيام العادية معجزات.
Viewing 0 reply threads