حلا شيحة تهاجم تامر حسني بعد مشاهدتها لكليب “بحبك”.. والأخير يرد عليها (صور)
هاجمت الفنانة حلا شيحة الفنان تامر حسني من خلال منشور لها على صفحتها الشخصية بموقع الانستجرام، وأعلنت عن غضبها بعد مشاهدتها لكليب اغنية “بحبك” في فيلمها الجديد “مش أنا”.
كتبت: “أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة.. أيام مُباركة وخصوصًا بعد آخر بوست نزلته ووضحت فيه أنا إيه، واتفاجئت أكتر خصوصًا بعد وعد تامر حسني ليا وتأكيده إنه هيحترم رغبتي، وبعض الطلبات اللي طلبتها منه بكل احترام وود الصيف اللي فات، وأكدلي إنه هيحترم رغبتي”.
وتابعت: “إحنا يمكن نجحنا بمقايس الدنيا، بس صدقوني بمقايس ربنا إحنا لم ولن ننجح، أنا عارفة ومتأكدة إن زملائي جُواهم خير، بس للأسف فتنة الشهرة والنجاح مش بتخلينا نشوف ونقيس الأمور صح.. بتكلم من قلبي، الكليب ده ميرضيش ربنا، وأنا عيطت لأني شفت نفسي في المشاهد دي، دي كانت زلة نتيجة ظروف مريت بيها، وكلنا بنغلط ولازم نغلط، علشان إحنا بشر بس المصيبة إننا بنغفل وبننسى”.
وأضافت: “أنا مش هتكسف من حد.. أنا تبت من المشاهد دي وهي لا تصح، وأنا غلطت وبصلح وأهم حاجة إن ربنا يرضى عني لأن في الآخر ده اللي هينفعنا.. مش الشهرة ولا النجاح، لا هو مش نجاح أصلا.. علشان النجاح الحقيقي حاجة تانية خالص.. إحنا أغلبنا ناسينها إلا القليلين منا”.
واستكملت الفنانة: “الفن لو بيخلينا نبعد عن منهج ربنا ومنبقاش قُدوة لولادنا يبقى باطل وميبقاش فن.. إحنا كلنا عندنا امتحان في الدنيا دي وحابة أفكرك بالفيديو ده يا تامر اللي قولت فيه أنا مش بتمنى أموت وأنا مطرب، أنا دايمًا خايف من كده، كلام أكيد قولته في لحظة صدق جُواك وجوانا كلنا”.
واختتمت حديثها: “شوفه تاني يمكن يفكرك إن جواك أكيد في صراع وأنا وكلنا.. كلنا بنغلط بس المهم في الآخر نتدارك الغلط ونصلح..{إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد”
وقام الفنان تامر حسني بالرد على تصريحات حلا شيحة، وكتب عبر حسابه الشخصي بموقع التواصل الاجتماعي “انستجرام”،قائلًا: “نهاركم جميل يا أغلى الناس، الحقيقة عمري ما بتخيل إني أدخل في نقاش بالشكل دا مع زميل بحترمه، وكان في بينا كل خير، للتوضيح بما إنك يا حلا كتبتي بوست وأشركتي الجمهور الكريم معانا، بدل ما كنتي تكلميني شخصيا ونتناقش بيني وبينك، فأنا مضطر أرد هنا برضو”.
وتابع: “أولًا أنا عمري ما وعدتك إن الكليب مش هينزل، دا محصلش أصلا يا حلا مش أنا خالص اللي أوعد وأخلف، الحقيقة إني احترمت كلامي معاكي ووعدتك أشيل مشاهد تانية طلبتيها، وشيلتها بالفعل وشكرتيني عليها، ولو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة”.